ਇਹ ਸਫ਼ਾ ਪ੍ਰਮਾਣਿਤ ਹੈ
ਸਾਲ ਹੋਣ ਲੱਗਾ ਮੈਨੂੰ ਕੱਲੇ ਛੱਡ ਗਿਆਂ ਤਾਈਂ,
ਇਕ ਇਕ ਘੜੀ ਗਿਣ ਗਿਣ ਹਾਂ ਬਿਤਾ ਰਿਹਾ।
ਇਨੇ ਵਿਚ ਬਾਲਾ ਬੋਲ ਪਿਆ ਜੇ ਪ੍ਰੇਮ ਨਾਲ,
ਸੁਣਨਾਂ! ਇਹ ਦੈਵੀ ਗੀਤ ਕੌਣ ਕਿਤੇ ਗਾ ਰਿਹਾ?
ਮਨਾਂ ਤਾਈਂ ਮੋਹ ਰਿਹਾ ਹੈ ਠੰਢ ਸੀਨੇ ਪਾ ਰਿਹਾ ਹੈ,
ਸਤਿਨਾਮ ਸਤਿਨਾਮ ਕੰਨਾਂ ’ਚ ਸੁਣਾ ਰਿਹਾ।
ਕਿਹੜੀ ਵਲੋਂ ਨੂਰ ਇਹ ਅਝੱਲਵਾਂ ਵਰਸੰਦਾ ਏ,
ਅਖੀਆਂ ਨੂੰ ਜਿਹੜਾ ਚਕਾ ਚੌਂਦ ਹੈ ਲਿਆ ਰਿਹਾ।
ਸ਼ਰਮ ਦੇ ਮਾਰੇ ਚੰਨ ‘ਤਾਰੇ' ਸਾਰੇ ਛੁਪ ਗਏ ਨੇ,
ਸੂਰਜ ਵਿਚਾਰਾ ਕਿਉਂ ਅੱਜ ਸ਼ਰਮਾ ਰਿਹਾ।
ਉਠ ਮਰਦਾਨਿਆਂ ਸੰਭਾਲ ਤੂੰ ਰਬਾਬ ਸੋਹਣੀ,
ਅਹੁ ਵੇਖ ਸਾਹਮਣੇ ਪਿਆਰਾ ਗੁਰੂ ਆ ਰਿਹਾ।
੪੨.
