ਪੰਨਾ:ਆਕਾਸ਼ ਉਡਾਰੀ.pdf/98

ਵਿਕੀਸਰੋਤ ਤੋਂ
Jump to navigation Jump to search
ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ

ਨਿਹੁੰ ਲਾ ਕੇ ਪਾਲਣੇ ਬੜੇ ਔਖੇ

 

ਸੌਖਾ ਕੰਮ ਨਹੀਂ ਲਾਣੀ ਪ੍ਰੀਤ ਯਾਰੋ,
ਧੰਦੇ ਪਿਆਰ ਦੇ ਘਾਲਣੇ ਬੜੇ ਔਖੇ ।
ਸਚੇ ਯਾਰ ਇਸ ਝੂਠੇ ਸੰਸਾਰ ਅੰਦਰ,
ਝਟ ਪਟ ਹੀ ਭਾਲਣੇ ਬੜੇ ਔਖੇ ॥
ਜੇ ਕਰ ਮਿਲ ਭੀ ਜਾਣ ਦੋ ਚਾਰ ਕਦੀ,
ਕਚ ਪਕੇ ਪਰਤਾਲਣੇ ਬੜੇ ਔਖੇ ।
ਦੋ ਵਖਰੇ ਵਖਰੇ ਦਿਲ ਲੈ ਕੇ,
ਇਕ ਸੱਚੇ ’ਚ ਢਾਲਣੇ ਬੜੇ ਔਖੇ ।
ਮੋਤੀ ਪਿਆਰ ਦੇ ਡੁਲ੍ਹੇ ਹੋਏ ਲਭਦੇ ਨਹੀਂ,
ਕੌਡਾਂ ਵਾਂਙ ਉਛਾਲਣੇ ਬੜੇ ਔਖੇ ।
ਭਾਂਬੜ ਪਿਆਰ ਦੇ ਬਲੇ ਹੋਏ ਬੁਝਦੇ ਨਹੀਂ,
ਬੁਝ ਜਾਣ ਤੇ ਬਾਲਣੇ ਬੜੇ ਔਖੇ।
ਦਿਲ ਪਿਆਰ ਦੇ ਹੁੰਦੇ ਨੇ ਕ ਵਰਗੇ,
ਹੋ ਜਾਂਦੇ ਸੰਭਾਲਣੇ ਬੜੇ ਔਖੇ ।
ਕਰੇ ਰਬ ਨਾ ਜੇ ਕਦੀ ਟੁਟ ਜਾਵਣ,
ਫੇਰ ਸਾਬਤ ਵਿਖਾਲਣੇ ਬੜੇ ਔਖੇ ।
ਮਸਲੇ ਮੋਹ ਮੁਹੱਬਤ ਤੇ ਪਿਆਰ ਵਾਲੇ,
ਗਲਾਂ ਨਾਲ ਨਿਕਾਲਣੇ ਬੜੇ ਔਖੇ।
ਗਲਾਂ ਕਰਨੀਆਂ ਯਾਰੋ ਸੁਖੱਲੀਆਂ ਨੇ,
ਨਿਹੁੰ ਲਾ ਕੇ ਪਾਲਣੇ ਬੜੇ ਔਖੇ ।

੧੦੬.