ਪੰਨਾ:ਖੰਡ ਮਿਸ਼ਰੀ ਦੀਆਂ ਡਲ਼ੀਆਂ - ਸੁਖਦੇਵ ਮਾਦਪੁਰੀ.pdf/104

ਵਿਕੀਸਰੋਤ ਤੋਂ
Jump to navigation Jump to search
ਇਹ ਸਫ਼ਾ ਪ੍ਰਮਾਣਿਤ ਹੈ


285
ਕਿੱਕਰਾਂ ਵੀ ਲੰਘ ਆਈ
ਬੇਰੀਆਂ ਵੀ ਲੰਘ ਆਈ
ਲੰਘਣੋਂ ਰਹਿ ਗਏ ਝਾਫੇ
ਜੇ ਮੇਰੀ ਸੱਸ ਮਰਜੇ
ਮੈਂ ਦੂਰੋਂ ਕਰਾਂ ਸਿਆਪੇ
286
ਕੁਰਸ਼ਾਂ ਦੀ ਮੈਂ ਚਾਂਦੀ ਵੈਰੀਆ
ਧੁਰੋ ਪਟਿਆਲਿਓਂ ਆਂਦੀ
ਸੌਕਣ ਨੇ ਤਾਂ ਚੂੜਾ ਕਰਾ ਲਿਆ
ਮੈਂ ਰਹਿ ਗਈ ਪਛਤਾਂਦੀ
ਮੇਰੇ ਹੱਥਾਂ ਦਾ ਦੁਧ ਨਾ ਪੀਂਦਾ
ਸੌਕਣ ਪਾਣੀ ਲਿਆਂਦੀ
ਛੱਡ ਕੇ ਪਾਰਬਤੀ-
ਘੁੰਡੀਆਂ ਵੇਚਣੀ ਲਿਆਂਦੀ
287
ਜੇਠ-ਜਠਾਣੀ
ਜੇਠ ਜਠਾਣੀ ਇੱਟਾਂ ਢੋਂਦੇ
ਮੈਂ ਢੌਂਦੀ ਗਾਰਾ
ਮੇਰੀ ਹਾ ਪੈ ਜੇ-
ਸਿਖਰੋਂ ਡਿੱਗੇ ਚੁਬਾਰਾ
288
ਜੇਠ ਜਠਾਣੀ ਗਾਰਾ ਢੋਂਦੇ
ਮੈਂ ਢੋਂਦੀ ਪਾਣੀ
ਮੇਰੀ ਹਾ ਪੈ ਜੇ-
ਸਿਖਰੋਂ ਡਿਗੇ ਜਠਾਣੀ
289
ਤਾਰਾਂ ਤਾਰਾਂ ਤਾਰਾਂ
ਬੋਲੀਆਂ ਦਾ ਖੂਹ ਭਰ ਦਿਆਂ
ਪਾਣੀ ਭਰਨ ਮੁਟਿਆਰਾਂ
ਬੋਲੀਆਂ ਦੀ ਸੜਕ ਬੰਨ੍ਹਾਂ
ਚਲਦੀਆਂ ਮੋਟਰ ਕਾਰਾਂ
ਬੋਲੀਆਂ ਦੀ ਰੇਲ ਭਰਾਂ
ਦੁਨੀਆਂ ਚੜ੍ਹੇ ਹਜ਼ਾਰਾਂ
ਬੋਲੀਆਂ ਦੀ ਨਹਿਰ ਭਰਾਂ
ਲਗਦੇ ਮੋਘੇ ਨਾਲਾਂ

100