ਪੰਨਾ:ਖੰਡ ਮਿਸ਼ਰੀ ਦੀਆਂ ਡਲ਼ੀਆਂ - ਸੁਖਦੇਵ ਮਾਦਪੁਰੀ.pdf/122

ਵਿਕੀਸਰੋਤ ਤੋਂ
ਇਹ ਸਫ਼ਾ ਪ੍ਰਮਾਣਿਤ ਹੈ

ਨੌਕਰ ਨਾ ਜਾਈਂ ਵੇ
351
ਜੇ ਮੁੰਡਿਆ ਸੀ ਭਰਤੀ ਹੋਣਾ
ਵਿਆਹ ਨਹੀਂ ਸੀ ਕਰਵਾਉਣਾ
ਤਿੰਨ ਤਿੰਨ ਵੇਲੇ ਕਰੌਣ ਪਰੇਟਾਂ
ਬਾਂਦਰ ਵਾਂਗ ਟਪਾਉਣਾ
ਮਾਰਨ ਗੋਲੇ ਸਿੱਟਣ ਮੂਧਾ
ਕੁੱਤਿਆਂ ਵਾਂਗ ਰੁਲਾਉਣਾ
ਨੌਕਰ ਨਾ ਜਾਈਂ ਵੇ-
ਆਪਣਾ ਦੇਸ ਨੀ ਥਿਆਉਣਾ
352
ਨੌਕਰ ਨੂੰ ਨਾ ਦਈਂ ਬਾਬਲਾ
ਹਾਲੀ ਪੁੱਤ ਬਥੇਰੇ
ਨੌਕਰ ਵਿਆਹ ਕੇ ਉਠਜੂ
ਮਗਰੋਂ ਛੜੇ ਮਾਰਨਗੇ ਗੇੜੇ
ਬ੍ਰਹਮਾ ਮਾਂ ਦੇ ਵਿੱਚ ਲੱਗੀ ਲੜਾਈ
ਗੋਲੀ ਚਲਦੀ ਚਾਰ ਚੁਫੇਰੇ
ਲਗਜੂ ਗੋਲੀ ਮਰਜੂ ਲਫੰਗਾ
ਕੀ ਹੱਥ ਆਊ ਤੇਰੇ
ਮੈਂ ਤੈਨੂੰ ਵਰਜ ਰਹੀ-
ਦਈਂ ਨਾ ਬਾਬਲਾ ਫੇਰੇ
353
ਨੌਕਰ ਨੂੰ ਨਾ ਵਿਆਹੀਂ ਵੇ ਬਾਬਲਾ
ਨੌਕਰ ਨੇ ਤਾਂ ਬੰਨ੍ਹ ਲਏ ਬਿਸਤਰੇ
ਹੋ ਗਿਆ ਗੱਡੀ ਦੇ ਨੇੜੇ
ਮੈਂ ਤੈਨੂੰ ਵਰਜ ਰਹੀ-
ਦਈਂ ਨਾ ਬਾਬਲਾ ਫੇਰੇ
354
ਗੱਡੀਏ ਨੀ ਤੇਰੇ ਪਹੀਏ ਟੁੱਟ ਜਾਣ
ਚਾਰੇ ਟੁੱਟ ਜਾਣ ਬਾਹੀਆਂ

118