ਇਹ ਸਫ਼ਾ ਪ੍ਰਮਾਣਿਤ ਹੈ
ਨਾ ਤਾਂ ਆਸ਼ਕ ਨੇ ਵਿਆਹ ਕਰਵਾਇਆ
ਨਾ ਬੰਨ੍ਹੇ ਨੇ ਸੇਹਰੇ
ਨਾ ਤਾਂ ਆਸ਼ਕ ਨੇ ਗੱਡੀ ਬੇਦੀ
ਨਾ ਤਾਂ ਲਏ ਨੇ ਫੇਰੇ
ਬਿਨਾ ਪਾਉੜਿਓਂ ਕੋਠੇ ਚੜ੍ਹ ਗਿਆ
ਪਾ ਕੇ ਹੱਥ ਬਨੇਰੇ
ਅੱਗ ਹਰਨਾਮੀ ਨੇ-
ਲਾ ਤੀ ਕਾਲਜੇ ਮੇਰੇ
416
ਮਹਿੰਦੀ ਮਹਿੰਦੀ ਸਭ ਜਗ ਕਹਿੰਦਾ
ਮੈਂ ਵੀ ਕਹਿੰਦਾ ਮਹਿੰਦੀ
ਬਾਗਾਂ ਦੇ ਵਿੱਚ ਮਿਲਦੀ ਸਸਤੀ
ਹੱਟੀਓਂ ਮਿਲਦੀ ਮਹਿੰਗੀ
ਹੇਠਾਂ ਕੂੰਡੀ ਉਪਰ ਸੋਟਾ
ਰਗੜ ਦੋਨਾਂ ਦੀ ਸਹਿੰਦੀ
ਰਗੜ ਰਗੜ ਕੇ ਲਾ ਲੀ ਹੱਥਾਂ ਨੂੰ
ਬੱਤੀਆਂ ਬਣ ਬਣ ਲਹਿੰਦੀ
ਚੋਟਾਂ ਇਸ਼ਕ ਦੀਆਂ-
ਗੋਰਿਆਂ ਪੱਟਾਂ ਤੇ ਸਹਿੰਦੀ
417
ਸਮਝਾ ਲੈ ਬੁੜ੍ਹੀਏ ਆਪਣੇ ਪੁੱਤ ਨੂੰ
ਨਿੱਤ ਠੇਕੇ ਇਹ ਜਾਂਦਾ
ਭਰ ਭਰ ਪੀਵੇ ਜਾਮ ਪਿਆਲੇ
ਫੀਮ ਬੁਰਕੀਏਂ ਖਾਂਦਾ
ਘਰ ਦੀ ਸ਼ੱਕਰ ਬੂਰੇ ਵਰਗੀ
ਗੁੜ ਚੋਰੀ ਦਾ ਖਾਂਦਾ
ਘਰ ਦੀ ਨਾਰੀ ਬੁਰਛੇ ਵਰਗੀ
ਨਿੱਤ ਮਿਹਰੀ ਦੇ ਜਾਂਦਾ
ਲੱਗਿਆ ਇਸ਼ਕ ਬੁਰਾ-
ਬਿਨ ਪੌੜੀ ਚੜ੍ਹ ਜਾਂਦਾ
418
ਰੰਡੀਏ ਹਟਾ ਪੁੱਤ ਨੂੰ
ਕੋਲ ਠੇਕੇਦਾਰ ਦੇ ਜਾਵੇ
ਠੇਕੇਦਾਰ ਅਜਬ ਬੁਰਾ
ਜਿਹੜਾ ਮੁਫਤ ਸ਼ਰਾਬ ਪਲਾਵੇ
136
