ਸਮੱਗਰੀ 'ਤੇ ਜਾਓ

ਪੰਨਾ:ਗ਼ੁਮਨਾਮ ਕੁੜੀ ਦੇ ਖ਼ਤ.pdf/10

ਵਿਕੀਸਰੋਤ ਤੋਂ
ਇਹ ਪੰਨਾ ਪ੍ਰਮਾਣਿਤ ਕੀਤਾ ਗਿਆ ਹੈ



ਭੂਮਿਕਾ

ਇਕ ਆਤਮਾ ਇਕ ਫ਼ਰਿਸ਼ਤੇ ਨੂੰ ਮਿਲੀ, ਤੇ ਉਸ ਨੇ ਪੁਛਿਆ, "ਸ੍ਵਰਗ ਦਾ ਸਭ ਤੋਂ ਨਜ਼ਦੀਕੀ ਮਾਰਗ ਕਿਹੜਾ ਹੈ – 'ਗਿਆਨ' ਦਾ ਜਾਂ 'ਪ੍ਰੇਮ' ਦਾ?"
ਫ਼ਰਿਸ਼ਤੇ ਨੇ ਹੈਰਾਨ ਹੋ ਕੇ ਪੁਛਿਆ, "ਕੀ ਇਹ ਦੋ ਵਖਰੇ ਮਾਰਗ ਨੇ?"
'ਪ੍ਰੇਮ ਹੀ ਅਸਲ ਵਿਚ 'ਗਿਆਨ' ਹੈ ਤੇ ਗਿਆਨ ਸ੍ਵਰਗ। ਜਿਸ ਦੀ ਅੰਦਰਲੀ ਆਤਮਾ ਵਿਚ ਗਿਆਨ ਪਰਕਾਸ਼ ਹੋ ਗਿਆ, ਉਸ ਲਈ ਇਹ ਦੁਨੀਆ ਸ੍ਵਰਗ ਬਣ ਗਈ, ਵਿਤਕਰੇ ਮਿਟ ਗਏ, ਵਖੇਵੇਂ ਦੂਰ ਹੋ ਗਏ ਤੇ ਹਰ ਚੀਜ਼ ਵਿਚ ਉਸ ਨੂੰ ਆਪਾ ਨਜ਼ਰ ਆਉਣ ਲਗਾ।
ਸ਼ੁਰੂ ਸਮੇਂ ਤੋਂ ਹੀ ਵਡੇ ਵਡੇ ਲੇਖਕ, ਫ਼ਿਲਾਸਫ਼ਰ ਤੇ ਵਿਚਾਰਕ ਏਸੇ ਗਿਆਨ ਰੂਪੀ ਪ੍ਰੇਮ ਦਾ ਮਾਰਗ ਦਸਦੇ ਆਏ ਹਨ। ਜੇ ਸਚ ਪੁਛਿਆ ਜਾਏ ਤਾਂ ਸ਼ੁਰੂ ਤੋਂ ਹੁਣ ਤੀਕ ਸਭਿਅਤਾ ਦੀ ਉੱਨਤੀ ਦੀ ਕਹਾਣੀ ਪ੍ਰੇਮ ਦੀ ਭਾਵਨਾ ਨੂੰ ਗਿਆਨ ਦੀ ਭਾਵਨਾ ਤਕ ਲੈ ਆਉਣ ਦੀ ਕਹਾਣੀ ਹੈ।