ਇਹ ਸਫ਼ਾ ਪ੍ਰਮਾਣਿਤ ਹੈ
468
ਯਾਰੀ ਲਾਈ ਸੀ ਗੁਆਂਢਣ ਕਰਕੇ
ਘਰ ਬਾਰ ਲੈ ਗੀ ਲੁੱਟ ਕੇ
469
ਇਹਦੀ ਪਿੰਡ ਦੇ ਮੁੰਡੇ ਨਾਲ਼ ਯਾਰੀ
ਘੜਾ ਨਾ ਚਕਾਇਓ ਕੁੜੀਓ
470
ਖਸਮਾਂ ਨੂੰ ਖਾਣ ਕੁੜੀਆਂ
ਆਪੇ ਚੱਕ ਨੂੰ ਮੌਣ ਤੇ ਧਰ ਕੇ
471
ਕਾਹਨੂੰ ਮਾਰਦੈਂ ਚੰਦਰਿਆ ਡਾਕੇ
ਔਖੀ ਹੋਜੂ ਕੈਦ ਕੱਟਣੀ
472
ਯਾਰ ਡਾਕੇ ਮਾਰਦਾ ਨਾ ਸਮਝਾਇਆ
ਲੰਬੇ ਲੰਬੇ ਬੈਣ ਪਾਉਨੀ ਐਂ
473
ਕਾਹਨੂੰ ਰੋਨੀਏਂ ਢਿੱਲ੍ਹੇ ਜਹੇ ਬੁਲ੍ਹ ਕਰ ਕੇ
ਆਸ਼ਕਾਂ ਨੂੰ ਨਿੱਤ ਬਦੀਆਂ
474
ਤੇਰੇ ਦੁੱਖਾਂ ਨੇ ਵੈਰੀਆ ਮੇਰੀ
ਰੂੰ ਵਾਂਗ ਜਿੰਦ ਪਿੰਜ ਤੀ
475
ਲੱਕ ਬੰਨ੍ਹ ਕੇ ਪੱਤਣਾਂ ਤੇ ਖੜੀਆਂ
ਜਿਨ੍ਹਾਂ ਨੂੰ ਲੋੜ ਮਿੱਤਰਾਂ ਦੀ
476
ਸਾਰਾ ਬਾਗ਼ ਹਵਾਲੇ ਕੀਤਾ
ਮਿੱਤਰਾਂ ਨੇ ਫੁੱਲ ਮੰਗਿਆ
477
ਮਿੱਤਰਾਂ ਦੀ ਲੂਣ ਦੀ ਡਲ਼ੀ
ਤੂੰ ਮਿਸ਼ਰੀ ਕਰ ਕੇ ਜਾਣੀ
478
ਪਾਰ ਲੰਘਣਾ ਸੱਜਣ ਨੂੰ ਮਿਲਣਾ
ਹੱਥ ਨਾਲ਼ ਹੱਥ ਜੋੜਦੀ
ਗਾਉਂਦਾ ਪੰਜਾਬ:: 75