ਇਹ ਸਫ਼ਾ ਪ੍ਰਮਾਣਿਤ ਹੈ
ਅਜ ਬੇਲਿਆਂ ਵਿਚ ਵੈਰਾਨੀ, ਹੋ!
ਅਜ ਮੰਗੂਆਂ ਤੇ ਹੈਰਾਨੀ, ਹੋ!
ਵਿਚ ਤ੍ਰਿਞਣਾ ਦੇ ਸੁੰਨਸਾਨੀ, ਹੋ!
ਸੁੰਨਸਾਨ ਫ਼ਜ਼ਾ ਛਣਕਾਂਦਾ ਹਾਂ!
ਮੈਂ ਗੀਤ ਝਨਾ ਦੇ ਗਾਂਦਾ ਹਾਂ!
ਕੁਚਿਆਂ ਦੇ ਜ਼ਮਾਨੇ ਬੀਤ ਗਏ,
ਜੋਗੀ ਦੇ 'ਫ਼ਸਾਨੇ ਬੀਤ ਗਏ,
ਬੰਧਨ ਉਹ ਪੁਰਾਣੇ ਬੀਤ ਗਏ,
ਮੈਂ ਨਵਾਂ ਸਮਾਜ ਰਚਾਂਦਾ ਹਾਂ!
ਮੈਂ ਗੀਤ ਝਨਾ ਦੇ ਗਾਂਦਾ ਹਾਂ!
ਕਿਉਂ ਇਸ਼ਕ ਮੁਹੱਬਤ ਪਾਪ ਰਹੇ?
ਕਿਉਂ ਆਸ਼ਕ ਨੂੰ ਸੰਤਾਪ ਰਹੇ?
ਕਿਉਂ ਧਰਤੀ ਤੇ ਵਿਰਲਾਪ ਰਹੇ?
ਮੈਂ ਰੋਂਦੇ ਨੈਣ ਹਸਾਂਦਾ ਹਾਂ!
ਮੈਂ ਗੀਤ ਝਨਾ ਦੇ ਗਾਂਦਾ ਹਾਂ!
ਆਵੋ ਨੀ ਸੋਹਣੀਓਂ, ਨੱਚ ਲਵੋ!
ਆਵੋ ਨੀ ਹੀਰੋ, ਮੱਚ ਲਵੋ!
ਓ ਪ੍ਰੀਤਾਂ ਵਾਲਿਓ, ਰੱਚ ਲਵੋ!
ਦਿਲ ਚਰਨਾਂ ਹੇਠ ਵਿਛਾਂਦਾ ਹਾਂ!
ਮੈਂ ਗੀਤ ਝਨਾ ਦੇ ਗਾਂਦਾ ਹਾਂ!
-੮੧-
