ਇਹ ਸਫ਼ਾ ਪ੍ਰਮਾਣਿਤ ਹੈ
ਆ ਸਹੀਏ ਰਲ ਗਿੱਧਾ ਪਾਈਏ
ਪੰਨਿਆਂ ਦੀ ਹੈ ਰਾਤ ਸੁਹਾਵੀ,
ਮਟਕ ਮਟਕ ਹੈ ਤੁਰਦੀ ਰਾਵੀ,
ਮੋਢੀਂ ਪਾਈ ਚਾਦਰ ਸਾਵੀ,
ਆ ਨੀ ਤੁਰ ਮੁਕਲਾਵੇ ਆਈਏ।
ਆ ਸਹੀਏ ਰਲ ਗਿੱਧਾ ਪਾਈਏ।
ਚੌਂਕ ਚੰਦ ਕੋਈ ਲਾਹ ਨਹੀਂ ਲੈਂਦਾ,
ਭੋਰ ਫੁੱਲਾਂ ਤੇ ਆ ਨਹੀਂ ਬਹਿੰਦਾ,
ਕੁਦਰਤ ਖੇੜਾ ਕੁਝ ਨਹੀਂ ਕਹਿੰਦਾ,
ਆ ਤੁਰ ਘੁੰਡ ਦਿਲਾਂ ਦੇ ਲਾਹੀਏ।
ਆ ਸਹੀਏ ਰਲ ਗਿੱਧਾ ਪਾਈਏ।
ਚਲ ਨੀ ਤੁਰ ਪੰਜਾਬੀ ਪਰੀਏ,
ਹੁਸਨ, ਇਸ਼ਕ ਥੀਂ ਨਕ ਨਕ ਭਰੀਏ,
ਚਲ ਜੰਗਲ ਵਿਚ ਮੰਗਲ ਕਰੀਏ,
ਚਲ ਦੋ ਘੜੀਆਂ ਰੋਣਕ ਲਾਈਏ।
ਆ ਸਹੀਏ ਰਲ ਗਿੱਧਾ ਪਾਈਏ
।੩੭