ਇਹ ਸਫ਼ਾ ਪ੍ਰਮਾਣਿਤ ਹੈ
ਸਈਆਂ ਨਚਣ, ਗਹਿਣੇ ਨਚਣ,
ਹਿੱਕਾਂ ਤੋਂ ਟੁੱਟ ਪੈਣੇ ਨਚਣ,
ਬੀਂਡੇ ਗਾਉਣ, ਟਟਹਿਣੇ ਨਚਣ,
ਵੇਖ ਵੇਖ ਨਾ ਜੀਅ ਤਰਸਾਈਏ।
ਆ ਸਹੀਏ ਰਲ ਗਿੱਧਾ ਪਾਈਏ।
ਇਕੋ ਹਾਣ ਦੀਆਂ ਮੁਟਿਆਰਾਂ,
ਜੁੜੀਆਂ ਖੜੀਆਂ ਵੇਖ ਬਹਾਰਾਂ,
ਸੁਰਗਾਂ ਅੰਦਰ ਨਚਣ ਨਾਰਾਂ,
ਆ ਕੋਈ ਰੋਂਦੂ ਅੱਖ ਹਸਾਈਏ।
ਆ ਸਹੀਏ ਚਲ ਗਿੱਧਾ ਪਾਈਏ।
ਢੋਲਕ ਤੇ ਜਦ ਲਾਵਣ ਠੇਕੇ,
ਭੁਲਣ ਉੱਕੇ ਸਹੁਰੇ ਪੇਕੇ,
ਰੱਬ ਉਚੇਰਾ ਅੱਖੀਆਂ ਕੇ,
ਚਲ ਤੁਰ ਪਿੜ ਨੂੰ ਹੋਰ ਭਖ਼ਾਈਏ।
ਆ ਸਹੀਏ ਰਲ ਗਿੱਧਾ ਪਾਈਏ।
ਵੇਖ ਰੌਣਕਾਂ, ਬੱਲੇ ਬੱਲੇ,
ਗਾਉਣ ਪੰਜਾਬੀ ਗੀਤ ਸੁਖੱਲੇ,
ਧੂਆਂ ਪਾਵਣ ਗੱਲੇ ਗੱਲੇ,
ਆ ਤੁਰ 'ਬੇਕਲ' ਜੀਅ ਪਰਚਾਈਏ।
ਆ ਸਹੀਏ ਰਲ ਗਿੱਧਾ ਪਾਈਏ।
੩੮
