ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
ਤਲਵਾਰ ਦੀ ਨੋਕ ਉਤੇ
ਹੁੰਦਾ ਵੇਖ ਮਜ਼ਲੂਮਾਂ ਤੇ ਜ਼ੁਲਮ ਭਾਰੀ,
ਕਲਗੀ ਵਾਲਿਆ ਤੇਰੀ ਤਲਵਾਰ ਨਿਕਲੀ।
ਤੇਰੇ ਇਕ ਇਸ਼ਾਰੇ ਦੇ ਹੁੰਦਿਆਂ ਹੀ,
ਜੋੜੀ ਪੁੱਤਰਾਂ ਦੀ ਛਾਲਾਂ ਮਾਰ ਨਿਕਲੀ।
ਮੁਰਦਾ ਰਗਾਂ ਅੰਦਰ ਜਾਨ ਪਾਉਣ ਖਾਤਰ,
ਤੇਰੇ ਖੰਡਿਓਂ ਅੰਮ੍ਰਿਤੀ ਧਾਰ ਨਿਕਲੀ।
ਪੱਕੀ ਕਰਨ ਲਈ ਨੀਂਹ ਕੁਰਬਾਨੀਆਂ ਦੀ,
ਲੜੀ ਲਾਲਾਂ ਦੀ ਹੋਣ ਨਿਸਾਰ ਨਿਕਲੀ।
ਕੀਤੀ ਦੀਨਾਂ ਤੇ ਦਇਆ ਦਿਆਲ ਹੋ ਕੇ,
ਮਹਿਮਾਂ ਖਿੱਲਰੀ ਲੋਕ ਪਰਲੋਕ ਉਤੇ।
ਤੂੰ ਸੀ ਤੋਲ ਵਿਖਾਲੀਆ ਜ਼ੁਲਮ ਤਾਈਂ,
ਚੰਡੀ ਰੂਪ ਤਲਵਾਰ ਦੀ ਨੋਕ ਉਤੇ।
ਤਲਵਾਰ ਤੇ
ਅੱਖਾਂ ਖੋਲ੍ਹ ਖਾਲਸਾ ਧਿਆਨ ਨਾਲ ਦੇਖ ਜ਼ਰਾ,
ਝੁਲ ਗਈ ਹਨੇਰੀ ਖ਼ੂਨੀ ਸਿੰਘ ਸਰਦਾਰ ਤੇ।
ਗਿੱਦੜਾਂ ਨੇ ਭੌਂਕ ਭੌੰਕ ਅਜ ਡਾਢਾ ਸ਼ੋਰ ਪਾਇਆ,
ਜਾਗ ਸ਼ੇਰਾ ਅੱਜ ਤੂੰ ਭੀ ਚੜ੍ਹ ਖਾਂ ਸ਼ਿਕਾਰ ਤੇ।
ਘਰ ਘਰ ਵਿਚ ਕੁਰਲਾਟ ਮਚ ਗਿਆ ਸਾਰੇ,
ਮਾਰਿਆ ਈ ਛਾਪਾ ਗ਼ੈਰਾਂ ਸਾਡੇ ਹੀ ਵਪਾਰ ਤੇ।
ਗਲ 'ਚਿ ਕਟਾਰ ਪਾ ਤਿਆਰ ਹੋ ਜਾ 'ਵੀਰ' ਪਿਆਰੇ,
ਫੇਰ ਪਰਖ ਹੋਣ ਲਗੀ ਜਬਰ ਦੀ ਤਲਵਾਰ ਤੇ।
-੮-
