ਪੰਨਾ:ਤਲਵਾਰ ਦੀ ਨੋਕ ਤੇ.pdf/48

ਵਿਕੀਸਰੋਤ ਤੋਂ
Jump to navigation Jump to search
ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ


ਮਜ਼ਦੂਰ ਦਾ ਹੋਕਾ

ਕਿਰਤੀਆਂ ਦੇ ਹਾਲ ਭੈੜੇ ਦੇਖ ਦੇਖ ਰੋਣ ਆਵੇ,
ਰੋਮ ਰੋਮ ਵਿਚੋਂ ਰੋਣ ਨਿਕਲਦਾ ਲਾਚਾਰੀ ਦਾ।
ਰੂਸ ਤੇ ਫਰਾਂਸ ਵਾਲੇ ਗੀਤ ਪਏ ਗਾਂਵਦੇ ਨੇ,
ਨਾਮ ਨਹੀਓਂ ਲੈਂਦੇ ਅਸੀਂ ਭਾਰਤ ਨਿਕਾਰੀ ਦਾ ।
ਵਜਾ ਏਹਦੀ ਪਤਾ ਹੈ ਜੇ ਝਾਤ ਮਾਰ ਵੇਖੋ ਭਲਾ,
ਲਭ ਪਵੇ ਦਾਰੂ ਮਤਾਂ ਲੁਕੀ ਹੋਈ ਬੀਮਾਰੀ ਦਾ।
ਸਭਨਾਂ ਦਾ ਧਿਆਨ ਅਜ ਏਦੂੰ ਉਤੇ ਜਾਪਦਾ ਏ,
ਚੜ੍ਹਿਆ ਹੋਇਆ ਪਾਰਾ ਵੇਖੋ ਏਥੇ ਹਾਰੀ ਸਾਰੀ ਦਾ।
ਖਾਣ ਨੂੰ ਨਾ ਰੋਟੀ ਲਭੇ ਨੋਚਦੇ ਨੇ ਮਾਸ ਬੈਠੇ,
ਆਪਣਿਆਂ ਭਰਾਵਾਂ ਦਾ ਤੇ ਜਨਤਾ ਦੁਖਿਆਰੀ ਦਾ ।
ਮੇਰੇ ਦਿਲੋਂ ਤਦੇ ਹੀ ਆਵਾਜ਼ ਉਠੇ ਜ਼ੋਰ ਵਾਲੀ,
ਸੁਣੋ ਲੋਕੋ ਦਸਾਂ ਫੁਰਮਾਨ ਏ ਉਡਾਰੀ ਦਾ।
ਅਦਬ ਕਰੋ ਰਬੋਂ ਡਰੋ ਪ੍ਰੇਮ ਵਾਲੀ ਤਾਰੀ ਤਰੋ,
ਏਕੇ ਵਿਚ ਆਂਵਦਾ ਸੁਆਦ ਹੈ ਜੀ ਤਾਰੀ ਦਾ।
ਸਾਗਰਾਂ ਤੋਂ ਪਾਰ ਹੋਵੋ ਪਰਬਤਾਂ ਨੂੰ ਚੀਰ ਦੇਵੋ,
ਚਾੜ੍ਹ ਦਿਓ ਮੁਨਾਰਾ ਉੱਚਾ ਉਨਤੀ ਅਟਾਰੀ ਦਾ ।
ਬੱਝੀ ਮੁਠ ਕਦੇ ਭੀ ਨਾ ਟੁਟਦੀ ਜਵਾਨ ਕੋਲੋਂ,
ਏਕੇ ਅਗੇ ਚੂਰ ਹੋਵੇ ਨਸ਼ਾ ਭੀ ਖੁਮਾਰੀ ਦਾ।
ਏਕੇ ਵਾਲਾ ਜਾਦੂ ਜਾਦੂਗਰਾਂ ਤੋਂ ਨਾ ਟੁਟਦਾ ਏ,
ਯੋਗੀਆਂ ਦਾ ਮੰਤਰ ਹੈ ਏਹ ਵਡੇ ਅਸਰ ਭਾਰੀ ਦਾ।
ਹਿੰਦੀਓ ਖੁਸ਼ਹਾਲ ਹੋਵੋ ਵਸੋ ਤੇ ਆਜ਼ਾਦ ਹੋਵੋ,
ਏਹੋ ਪਾਠ ਬਾਣੀ ਵਾਲਾ ਮੁੱਖ ਤੋਂ ਉਚਾਰੀਦਾ ।

-੪੪-