ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
ਸਾਡਾ ਕਿਸ ਤਰ੍ਹਾਂ ਮੁਲਕ ਆਜ਼ਾਦ ਹੋਵੇ
ਰੋਕਣ ਲਈ ਤੁਫਾਨ ਮੁਸੀਬਤਾਂ ਦਾ,
ਜੁਸਾ ਅਸਾਂ ਦਾ ਵਾਂਗ ਫੌਲਾਦ ਹੋਵੇ ।
ਦਿਲ ਵਿਚ ਦੇਸ਼ ਤੇ ਪਰੇਮ ਦੀ ਲਗਨ ਹੋਵੇ,
ਵਤਨ ਪਿਆਰ ਦੀ ਮੰਗੀ ਹੋਈ ਯਾਦ ਹੋਵੇ ।
ਸਬਕ ਇਕ ਏਕੇ ਵਾਲਾ ਹੋਏ ਪੜ੍ਹਿਆ,
ਏਸੇ ਸਬਕ ਦਾ ਖੂਬ ਉਸਤਾਦ ਹੋਵੇ ।
ਲਖਾਂ ਸੰਡੇ ਮਰਕੰਡ ਭੁਲਾਣ ਬੇਸ਼ਕ,
ਭੁਲਦਾ ਕਦੇ ਨਾ ਭਗਤ ਪ੍ਰਹਿਲਾਦ ਹੋਵੇ।
ਤੱਕ ਕੇ ਦੇਸ਼ ਤੇ ਕੌਮ ਦੀ ਦਸ਼ਾ ਭੈੜੀ,
ਸੀਨਾ ਏਸ ਦਾ ਦੁਖੀ ਬਰਬਾਦ ਹੋਵੇ ।
'ਵੀਰ' ਇਸ ਤਰ੍ਹਾਂ ਜੇ ਦਿਲ ਦੀ ਹੋਏ ਹਾਲਤ,
ਤਾਂ ਫਿਰ ਅਸਾਂ ਦਾ ਮੁਲਖ ਆਜ਼ਾਦ ਹੋਵੇ।
ਅਜ ਨਜ਼ਰ ਮਾਰੋ ਤਾਂ ਕੀ ਦਿਸਦਾ ਏ,
ਭੈੜੇ ਹਾਲ ਨੇ ਦੇਸ ਕੰਗਾਲ ਕੀਤਾ।
ਜਗ੍ਹਾ ਜਗ੍ਹਾ ਗਦਾਰਾਂ ਨੇ ਉਠ ਕੇ ਹੀ,
ਆਪਣੇ ਵੀਰਾਂ ਤਾਈਂ ਪਾਇਮਾਲ ਕੀਤਾ।
ਕਿਤੇ ਓਸ ਦੀ ਸੰਘੀ ਨੂੰ ਘੁੱਟਦੇ ਨੇ,
ਕਿਤੇ ਏਸ ਦਾ ਹੈ ਬੁਰਾ ਹਾਲ ਕੀਤਾ।
ਵੈਰ ਪਾਲਦੇ ਜਿੰਦ ਨੂੰ ਸਾੜ ਦੇਂਦੇ,
ਜਿਨ੍ਹਾਂ ਧ੍ਰੋਹ ਇਸ ਦੇਸ ਦੇ ਨਾਲ ਕੀਤਾ।
-੫੫-
