ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
ਨੀ, ਉਹ ਜੀਹਨੇ ਬੋਲ ਸੁਣਾਯਾ।
ਮੋਇਆਂ ਨੂੰ ਜਿਸ ਫੇਰ ਜਿਵਾਯਾ ।
ਨੀ, ਜੀਹਦਾ ਦਰਬਾਰ ਸ਼ਾਹਾਨਾ ।
ਨੀ, ਜੀਹਦਾ ਬਾਲਾ, ਮਰਦਾਨਾ ।
ਨੀ, ਥੁੜੀਆਂ ਦੇ ਭਰੇ ਭੰਡਾਰੇ ।
ਨੀ, ਥਿੜਿਆਂ ਦੇ ਕਾਜ ਸਵਾਰੇ ।
ਨੀ, ਜਿਸ ਸਿਦਕ ਸਿਖਾਏ ਭਾਰੇ ।
ਨੀ, ਜਿਸ ਸੱਜਨ ਵਰਗੇ ਤਾਰੇ ।
ਹਿੰਦੂ ਮੁਸਲਮ ਕੋਲ ਬਹਾਯਾ ।
ਨੀ, ਜਿਸ ਏਕਾ ਕਰਨ ਸਿਖਾਯਾ ।
ਨੀ, ਜਿਸ ਸੁੱਤੇ ਝੂਣ ਜਗਾਏ ।
ਨੀ, ਜਿਸ ਧਰਮ ਈਮਾਨ ਸਿਖਾਏ ।
ਨੀ, ਜਿਸ ਸੱਚੇ ਚੰਨ ਚੜ੍ਹਾਏ ।
ਝੂਠ ਬਖੀਲੀ ਮਾਰ ਮੁਕਾਏ ।
ਹਿੰਦੂ ਮੁਸਲਿਮ ਦਾ ਉਹ ਸਾਂਝਾ ।
ਨੀ, ਉਹ ਮੇਰਾ ਨੂਰੀ-ਰਾਂਝਾ ।
ਉਹ ਅਰਸ਼ਾਂ ਦਾ ਪਾਕ-ਨਜ਼ਾਰਾ ।
ਨੂਰੀ-ਪੁਤਲਾ ਨਾਨਕ ਪ੍ਯਾਰਾ ।
ਢੱਠੇ ਦਿਲ ਦੀ ਆਸ, ਸਹਾਰਾ ।
ਹੈ ਉਹ ਬੰਦਾ, ਪਰ ਹੈ ਨਿਆਰਾ।
ਸਬਕ ਦਇਆ ਦੇ ਦਸਣ ਵਾਲਾ ।
ਅੰਮ੍ਰਿਤ ਬਣ ਕੇ ਵੱਸਣ ਵਾਲਾ।
ਨੀ ਮੈਂ ਓਹਦੀ ਗੋੱਲੀ ਬਾਂਦੀ ।
ਰੁੜ੍ਹਦੀ ਜਾਂਦੀ ਗੋਤੇ ਖਾਂਦੀ ।
ਕਰਮਾਂ ਕੋਲੋਂ ਹਾਂ ਸ਼ਰਮਾਂਦੀ ।
ਬੂਹੇ ਓਹਦੇ ਮੁੜ ਮੁੜ ਜਾਂਦੀ ।
੩੦.
