ਪੰਨਾ:ਪੂਰਨ ਜਤੀ ਤੇ ਮਤ੍ਰੇਈ ਲੂਣਾ.pdf/11

ਵਿਕੀਸਰੋਤ ਤੋਂ
Jump to navigation Jump to search
ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ


ੴ ਸਤਿਗੁਰਪ੍ਰਸਾਦਿ॥

ਸਾਲਹਨ ਦਾ ਰਾਜ

੧.

ਸਿਆਲ ਕੋਟ ਭਾਵੇਂ ਰਾਜੇ ਸਲਵਾਹਨ ਦੇ ਸਮੇਂ ਐਡੀ ਭਾਰ ਘੁੱਗ ਵਸਦੀ ਨਗਰੀ ਨਹੀਂ ਸੀ, ਪਰ ਪ੍ਰਤਾਪੀ ਭੁਜਾ ਬਲ ਦੇ ਮਾਲਕ ਰਾਜੇ ਦੀ ਹਰਮਨ ਪਿਆਰੀ ਵਰਤੋਂ ਦੇ ਸਦਕੇ ਢੇਰ ਸਾਰੇ ਲੋਕ ਏਸ ਜਗਾ ਪਰ ਆ ਵੱਸੇ ਸਨ।ਰਾਜੇ ਦਾ ਪਰਜਾ ਨਾਲ ਚੰਗਾ ਵਰਤਾਉ ਤੇ ਪਿਆਰ ਸੀ, ਇਸ ਲਈ ਅਸ਼ਾਂਤੀ ਦਾ ਏਸ ਰਾਜ ਵਿੱਚ ਰੰਚਕ ਮਾਤ੍ਰ ਨਾਮ ਤੱਕ ਨਹੀਂ ਸੀ ਤੇ ਏਸੇ ਹੀ ਕਰਕੇ ਏਸ ਵੱਲੋਂ ਦੇ ਲਾਗੇ ਦੂਰ ਦੂਰ ਤੱਕ ਚੰਗੇ ਚੰਗੇ ਮਕਾਨ ਤੇ ਸੁਹਾਵਣੇ ਬਾਗ ਆਦਿਕ ਦਿਨ ਰਾਤ ਵਧਦੇ ਜਾਂਦੇ ਸਨ ਤੇ ਏਹ ਸ਼ੈਹਰ ਦਿਨ ਦੂਣਾ ਰਾਤ ਚੌਗਣਾ ਉੱਨਤ ਤੇ ਪ੍ਰਫੁਲਤ ਹੁੰਦਾ ਜਾ ਰਿਹਾ ਸੀ।

ਰਾਜੇ ਦਾ ਇਨਸਾਫ ਭੀ ਪਰਜਾ ਨਾਲ ਚੰਗੇਰਾ ਸੀ, ਜਿਸ ਤੋਂ ਪਰਜਾ ਦੇ ਲੋਕ ਆਪਣਾ ਠੀਕ ਠੀਕ ਇਨਸਾਫ ਕਰਵਾ ਪਸੰਨ ਹੁੰਦੇ ਤੇ ਰਾਜੇ ਦੇ ਜੱਸ ਗਾਇਨ ਕਰਦੇ ਸਨ, ਐਸੀ ਸੁੰਦਰ ਨਗਰੀ ਤੇ ਸੁਹਾਵਣੇ ਰਾਜ ਵਿੱਚ ਜੇ ਕੋਈ ਘਾਟਾ ਦਿਖਾਈ ਦੇ ਰਿਹਾ ਸੀ ਤਾਂ ਉਹ ਕੇਵਲ ਏਹੋ ਹੀ ਸੀ ਕਿ ਰਾਜ ਦੇ ਯੁਵਰਾਜ ਟਿੱਕਾ ਸਾਹਿਬ ਦਾ ਜਨਮ ਰਾਜ ਗ੍ਰਹਿ ਵਿਖੇ ਵਰਿਹਾਂ ਦੀ ਸਿੱਕ ਪਿਛੋਂ ਭੀ ਅਜੇ ਤੱਕ ਨਹੀਂ ਹੋਇਆ।