ਇਹ ਸਫ਼ਾ ਪ੍ਰਮਾਣਿਤ ਹੈ
ਛੋਟੇ ਨਾਲ਼ ਨਾ ਵਿਆਹੀਂ ਬਾਬਲਾ
ਛੋਟਾ ਖਰਾ ਸ਼ੁਦਾਈ
ਡੰਗਰਾਂ ਦੇ ਵਿਚ ਮੰਜਾ ਡਾਹੇ
ਬੜੇ ਜੇਠ ਦਾ ਭਾਈ
ਬਾਕੀ ਪੀਂਦੇ ਦੁਧ ਸਰਦਾਈਆਂ
ਉਹਨੂੰ ਝਾਤ ਪੁਆਈ
ਲੇਫ ਤਲਾਈਆਂ ਆਪ ਲੈਂਦੇ
ਉਹਨੂੰ ਲੀਰੋ ਲੀਰ ਰਜਾਈ
ਮੈਨੂੰ ਘਰ ਛੋਟੇ ਦੇ-
ਕੈਦ ਕੱਟਣੀ ਆਈ
ਰੱਥ ਦੀ ਟੁੱਟ ਗਈ ਫੱਟੀ
ਗੁਲਾਬ ਸਿੰਘ ਨਿੱਕਾ ਜਿਹਾ
ਮੈਂ ਮਾਝੇ ਦੀ ਜੱਟੀ
ਵਰ ਨੀ ਟੋਲਦੀਆਂ
ਬਦਲੇ-ਖੋਰੀਆਂ ਮਾਵਾਂ
ਨਿੱਕੇ ਜਹੇ ਮੁੰਡੇ ਨਾਲ਼
ਵਿਆਹ ਕਰ ਦਿੰਦੀਆਂ
ਦੇ ਕੇ ਚਾਰ ’ਕ ਲਾਵਾਂ
ਏਸ ਜੁਆਨੀ ਨੂੰ-
ਕਿਹੜੇ ਖੂਹ ਵਿਚ ਪਾਵਾਂ
ਗੱਡੀ ਆਉਂਦੀ ਐ ਬਣਾਂ ਦੇ ਉਹਲ਼ੇ
ਗੱਡੀ ਵਿਚ ਮੈਂ ਰੋਵਾਂ
ਮੇਰੀ ਕੱਤਣੀ ‘ਚ ਰੋਣ ਪਟੋਲੇ
ਵਣ ਵਣ ਰੋਵੇ ਲੱਕੜੀ
ਯਾਰ ਰੋਣ ਕਿੱਕਰਾਂ ਦੇ ਓਹਲ਼ੇ
ਬੋਲੀ ਨਾ ਬੁਲਾਈ ਕੁੜੀਓ
198 - ਬੋਲੀਆਂ ਦਾ ਪਾਵਾਂ ਬੰਗਲਾ
