ਇਹ ਸਫ਼ਾ ਪ੍ਰਮਾਣਿਤ ਹੈ
ਨੌਕਰ ਜਾਂਦੇ ਕੀ ਖਟ ਲਿਆਉਂਦੇ
ਖੱਟ ਕੇ ਲਿਆਂਦਾ ਕਸ ਵੇ
ਮੈਂ ਕੱਚੀ ਗੁਣਾਂ ਦੀ
ਲੰਬੀ ਦੇਖ ਨਾ ਹਸ ਵੇ
ਨੌਕਰ ਜਾਂਦੇ ਕੀ ਖੱਟ ਲਿਆਉਂਦੇ
ਖੱਟ ਕੇ ਲਿਆਂਦਾ ਫੁੱਲ ਵੇ
ਮੈਂ ਪੱਕੀ ਗੁਣਾਂ ਦੀ-
ਮੱਧਰੀ ਦੇਖ ਨਾ ਡੁਲ ਵੇ
ਉਚੇ ਟਿੱਬੇ
ਉੱਚੇ ਟਿੱਬੇ ਮੈਂ ਆਟਾ ਗੁੰਨ੍ਹਾਂ
ਆਟੇ ਨੂੰ ਆ ਗਈ ਲਾਲੀ
ਵੀਰਾ ਨਾ ਵੱਢ ਵੇ-
ਸ਼ਾਮਲਾਟ ਦੀ ਟਾਹਲੀ
ਉੱਚੇ ਟਿੱਬੇ ਇਕ ਛੋਲਿਆਂ ਦਾ ਬੂਟਾ
ਉਹਨੂੰ ਲੱਗੀਆਂ ਢਾਈ ਟਾਂਟਾਂ
ਕਰਾਦੇ ਨੀ ਮਾਏਂ
ਜੜੁੱਤ ਬਾਂਕਾਂ
ਉੱਚੇ ਟਿੱਬੇ ਮੈਂ ਸੱਗੀ ਧੋਵਾਂ
ਸੱਗੀ ਨੂੰ ਲੈ ਗਿਆ ਕੌਂ
ਕੁੜੀ ਮੈਂ ਸਾਧਾਂ ਦੀ
ਧੰਨ ਕੁਰ ਮੇਰਾ ਨੌਂ
ਉੱਚੇ ਟਿੱਬੇ ਦੋ ਸਾਧੂ ਉਤਰੇ
ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦੇ
ਪਿੱਛੋਂ ਮਾਰਦੇ ਗੋਡਾ
ਲੱਕ ਮੇਰਾ ਪਤਲਾ ਜਿਹਾ
ਭਾਰ ਸਹਿਣ ਨਾ ਜੋਗਾ
308 - ਬੋਲੀਆਂ ਦਾ ਪਾਵਾਂ ਬੰਗਲਾ