ਇਹ ਪੰਨਾ ਪ੍ਰਮਾਣਿਤ ਕੀਤਾ ਗਿਆ ਹੈ
ਸਹਿਮ ਸਹਿਮ ਸਿਰ ਚਾਂਦਾ ਤੂੰ,
ਤਿਤਰੀ ਤਾਈਂ ਡਰਾਂਦਾ ਤੂੰ।
ਏਹ ਜਿੰਦੜੀ ਤੜਫਾ ਨ ਅੜਿਆ,
ਸਹਿਮ ਸਹਿਮ ਮੁਰਝਾ ਨ ਅੜਿਆ।
ਮੈਂ ਕੋਈ ਆਦਮ ਖੋਰ ਨਹੀਂ ਹਾਂ,
ਮੈਂ ਜ਼ਾਲਮ ਦਾ ਜ਼ੋਰ ਨਹੀਂ ਹਾਂ।
ਨਹੀਂ ਕਿਸੇ ਨੂੰ ਮਾਰਨ ਜੋਗਾ,
ਵਿਚ ਪਿੰਜਰੇ ਨਹੀਂ ਤਾੜਨ ਜੋਗਾ,
ਨ ਮੈਂ ਧੌਣ ਮਰੋੜਨ ਜੋਗਾ,
ਨ ਮੈਂ ਲਗੀਆਂ ਤੋੜਨ ਜੋਗਾ।
ਮੈਂ ਕੀ ਖੰਭ ਕਿਸੇ ਦੇ ਖੋਹਣੇ?
ਮੈਂ ਕੀ ਕੇਸ਼ ਕਿਸੇ ਦੇ ਛੋਹਣੇ।
ਮੈਂ ਨਹੀਂ ਹਾਂ ਸੱਯਾਦ ਚਮਨ ਦਾ,
ਨ ਦੋਸਾਸ਼ਨ ਦਰਯੋਧਨ ਦਾ।
ਮੈਂ ਹਾਂ ਆਪ ਕਿਸੇ ਦਾ ਕੈਦੀ,
ਲਾਲੀ ਦੀ ਵੀ ਹੋਈ ਸੁਫੈਦੀ।
ਮੇਰੀ ਧੌਣ ’ਚ ਵਲ ਨੇ ਲੱਖਾਂ,
ਲਗ ਲਗ ਟੁਟੀਆਂ ਮੇਰੀਆਂ ਅੱਖਾਂ।
ਲਾਗੇ ਆ ਜਾ ਡਰ ਭੌ ਲ੍ਹਾਕੇ,
ਤਿਤਰੀ ਨੂੰ ਬੇ-ਫ਼ਿਕਰ ਬਣਾ ਕੇ।
ਹੌਲੀ ਹੌਲੀ ਗਾਈ ਜਾ,
ਮੇਰੇ ਦਰਦ ਵੰਡਾਈ ਜਾ।
-੧੩੨-
