ਇਹ ਸਫ਼ਾ ਪ੍ਰਮਾਣਿਤ ਹੈ
ਪੰਜੇ ਉਂਗਲਾਂ ਪੰਜ ਦਰਿਆ ਬਣ ਗਏ,
ਵਿਚ ਅੰਮ੍ਰਤ ਬੈਕੁੰਠ ਦਾ ਵੈਣ੍ਹ ਲੱਗਾ ।
ਸਿਖੀ-ਫੁੱਲ ਕੁਰਬਾਨੀ ਦੀ ਪੀਂਘ ਪਾ ਕੇ,
ਝੂਟੇ ਸੋਹਣੇ ਪੰਜਾਬ ਵਿਚ ਲੈਣ ਲੱਗਾ ।
ਓਸੇ ਪੰਜੇ ਦੇ ਪੂਰੇ ਸਬੂਤ ਬਦਲੇ,
ਪਰਦਾ ਜੱਗ ਦੇ ਨੈਣਾਂ ਤੋਂ ਲਾਹ ਦਿੱਤਾ ।
ਸੁੱਕੇ ਹਸਨ ਅਬਦਾਲ ਦੇ ਪੱਥਰਾਂ ਤੇ,
ਪੰਜਾ ਨਾਨਕ ਨੇ ਫੇਰ ਲਗਾ ਦਿੱਤਾ ।
ਗਹੁ ਨਾਲ ਵੇਖੇ ਉਹਨੂੰ ਕੋਈ ਜੇਕਰ,
ਮੈਲ ਦੁਈ ਦੀ ਅਕਲ ਤੋਂ ਲੱਥਦੀ ਏ ।
ਓਥੇ ਕਟੜਾਂ ਤੋਂ ਕੱਟੜ ਮਨ ਜਾਂਦੇ,
ਮੋਹਰ ਲਗੀ ਇਹ ਨਾਨਕੀ ਹੱਥ ਦੀ ਏ ।
ਜੇਕਰ ਅਜੇ ਨ ਆਏ ਯਕੀਨ ਤੈਨੂੰ,
ਲੈ ਆ ਤੇਜ਼ ਕਿਧਰੋਂ ਖ਼ੁਰਦਬੀਨ ਕੋਈ ।
ਜਿਨੂੰ ਵੇਖ ਤੂੰ ਆਪੇ ਹੀ ਮੰਨ ਜਾਵੇਂ,
ਤੈਨੂੰ ਜਿਹਾ ਵਿਖਾਵਾਂਗਾ ਸੀਨ ਕੋਈ ।
ਜਿਹੜਾ ਜ਼ੱਰਾ ਵੀ ਵੇਖੇਂ ਪੰਜਾਬ ਦਾ ਤੂੰ,
ਵਿਚ ਕੁਰਬਲਾ ਏਹੋ ਜਹੀ ਬਣੀ ਹੋਈ ਏ ।
ਪੁਤਰ ਪਾਣੀ ਜੇ ਮੰਗਿਆ ਪਿਤਾ ਕੋਲੋਂ,
ਅਬਰੂ ਰੋਹ ਅੰਦਰ ਦੂਹਰੀ ਤਣੀ ਹੋਈ ਏ ।
ਕਿਧਰੇ ਦੋਹਾਂ ਜਹਾਨਾਂ ਦੇ ਚੰਦ ਸਾਡੇ,
ਨੀਂਹਾਂ ਇਹਦੀਆਂ ਵਿਚ ਚਿਣਾਏ ਹੋਏ ਨੇ ।
- ੭੦ -
