ਇਹ ਸਫ਼ਾ ਪ੍ਰਮਾਣਿਤ ਹੈ
ਗੁਰੂ ਸਿੱਖ ਤੇ ਸਿੱਖ ਜਾਂ ਗੁਰੂ ਬਣਿਆ,
ਕੰਬ ਉਠੇਗੀ ਕੁਲ ਸਰਕਾਰ ਤੇਰੀ ।
ਇਹਦੇ ਸਬਰ ਦੀ ਅੱਗ ਜਾਂ ਭੜਕ ਉਠੀ,
ਪੰਘਰ ਜਾਏਗੀ ਖ਼ੂਨੀ ਤਲਵਾਰ ਤੇਰੀ ।
ਹਰ ਸਿੱਖ ਵਿਚ ਜਾਗਿਆ ਜਦੋਂ ਅਰਜਨ,
ਤੈਨੂੰ ਸਦਾ ਦੀ ਨੀਂਦ ਸੁਵਾਵਣਾ ਏਂ ।
ਤੇਰੇ ਏਸ ਮਗ਼ਰੂਰ ਜਿਹੇ ਤਾਜ ਤਾਈਂ,
ਇਨ੍ਹੇ ਪੈਰਾਂ ਦੇ ਨਾਲ ਠੁਕਰਾਵਣਾ ਏਂ ।
ਰਾਜ ਕਰਨਗੇ ਭੂਰਿਆਂ ਵਾਲੜੇ ਈ,
ਲੇਖਾ ਏਸ ਨੇ ਇੰਜ ਨਿਪਟਾਵਣਾ ਏਂ ।
ਦਰ ਦਰ ਮੰਗਦੀ ਫਿਰੂ ਉਲਾਦ ਤੇਰੀ,
ਕਿਸੇ ਮੰਗਿਆ ਖੈਰ ਨਾ ਪਾਵਣਾ ਏਂ ।
ਏਹਦੀ ਚੁੱਪ ਚੋਂ ਗੱਜਗਾ ਸ਼ੇਰ ਬੱਬਰ,
ਕੰਬੂ ਕਬਰ ਵਿਚ ਜਾਨ ਮੂੰਹ ਮਾਰ ਤੇਰੀ ।
ਟੰਗੀ ਹੋਈ ਲਾਹੌਰ ਦੇ ਕਿਲ੍ਹੇ ਅੰਦਰ,
ਤੇਰੇ ਲੇਖਾਂ ਨੂੰ ਰੋਊ ਤਲਵਾਰ ਤੇਰੀ ।
- ੭੯ -
