ਇਹ ਸਫ਼ਾ ਪ੍ਰਮਾਣਿਤ ਹੈ
ਪਿਕਨਿਕ
ਪਿਕਨਿਕ-
ਅਮੀਰਾਂ ਦਾ ਚੋਝ ਸੀ।
ਪ੍ਰੇਮੀਆਂ ਦੀ ਖੋਝ ਸੀ।
ਘਰ ਹੁੰਦਿਆਂ ਬੇਘਰ............
ਸ਼ਹਿਰ ਤੋਂ ਦੂਰ
ਕਿਸੇ ਨਦੀ ਕਿਨਾਰੇ
ਕਿਸੇ ਬਾਗ਼ ਦੇ ਅੰਦਰ,
ਬਨਾਣਾ ਕੁਦਰਤ ਦਾ ਘੱਰ।
ਇਕ ਅੱਧ ਬਰਤਨ
ਤੇ ਸਫਰੀ ਸਾਮਾਨ।
ਇੱਟਾਂ ਦੇ ਚੁਲ੍ਹੇ
ਕੱਖਾਂ ਦਾ ਬਾਲਨ
ਕੱਚੀ ਪੱਕੀ ਰੋਟੀ
ਤੇ ਠੰਡੀ ਚਾਹ-
ਸਭ ਕੁਝ ਪਰਵਾਨ।
ਅੱਜ ਵੀ ਲੱਖਾਂ ਸ਼ਰਨਾਰਥੀ
ਬੇਘਰੇ ਪੰਜਾਬ ਦੇ
ਕਰ ਰਹੇ ਨੇ ਪਿਕਨਿਕ;
ਸੜਕਾਂ ਦੇ ਕਿਨਾਰੇ
ਖੋਲਿਆਂ ਦੇ ਅੰਦਰ
ਫਸੀਲਾਂ ਦੇ ਛੱਜਿਆਂ ਥੱਲੇ।
ਗੁਆ ਕੇ
ਬਾਲ ਬੱਚੇ ਔਰਤਾਂ ਤੇ
ਜੋ ਕੁਛ ਹੈ ਸੀ ਪੱਲੇ।
੨੨੩
