ਲਹਿੰਦੀ ਪੰਜਾਬੀ 'ਸ਼ਬਦ-ਕੋਸ਼'
ਮਿੰਬਰ: ਕਾਜ਼ੀ ਦਾ ਚੌਂਤਰੇ ਦਾ ਆਸਨ
ਮਿੰਬਰਾਂ ਤੇ ਬਹਿ ਕੇ ਕਾਜ਼ੀ ਆਪ ਕੁਫਰ ਪਏ ਤੁਲੀੰਦੇ ਹਿਨ।
(ਚੌਂਤਰੇ ਤੇ ਆਸਨ ਲਾ ਕੇ ਬੈਠੇ ਕਾਜ਼ੀ ਝੂਠ ਵਰਤਾ ਰਹੇ ਨੇ)
ਮਿਰਦੰਗ: ਜੋੜੀ (ਢੋਲਕੀਆਂ ਦੀ)
ਵਾਜੇ ਵਾਲੇ ਡੂ ਤੇ ਹਿੱਕ ਮਿਰਦੰਗ ਵਾਲਾ, ਤ੍ਰੈ ਹੋਸਿਨ।
(ਵਾਜੇ ਵਾਲੇ ਦੋ ਤੇ ਜੋੜੀ ਵਾਲਾ ਇਕ, ਤਿੰਨ ਹੋਣਗੇ)
ਮਿਲਸ: ਉਠ ਦੀ ਜੱਤ
ਮਿਲਸ ਪਈ ਹੇ, ਕਤੂੰ, ਧੁੱਸਾ ਬਣਸੀ, ਨਿਘਾ ਹੂੰਦੈ।
(ਉਠਾ ਦੀ ਜੱਤ ਪਈ ਹੈ, ਕਤੀਏ, ਦੋੜਾ ਬਣੂੰ, ਨਿਘਾ ਹੁੰਦਾ ਹੈ)
ਮਿਲਖ: ਸੰਪਤੀ
ਮਿਲਖਾਂ ਦੇ ਝੇੜੇ ਪਵਣ ਤਾਂ ਰਤ ਪਾਣੀ ਥੀ ਵੰਞੇ।
(ਸੰਪਤੀ ਦੇ ਝਗੜੇ ਪੈਣ ਤਾਂ ਲਹੂ ਪਾਣੀ ਹੋ ਜਾਵੇ)
ਮਿਲਾਵਾ/ਮਿਲਣੀ: ਮੇਲ
ਧੇਤੇ-ਪੁਤ੍ਰੇਤੇ ਮਿਲਾਵਾ/ ਮਿਲਣੀ ਕਰਦੇ ਪਏ ਹਿਨ, ਕਤਰਾਂ ਖੱਲੋ।
(ਧੇਤੇ-ਪੁਤੇਤੇ ਮੇਲ ਹੋ ਰਿਹਾ ਹੈ, ਜ਼ਰਾ ਰੁਕੋ)
ਮੀਆਂ: ਖਾਵੰਦ/ਪਤੀ; ਮੀਆਂ ਬੀਵੀ/ਬੀਬੀ: ਪਤੀ-ਪਤਨੀ
ਸਾਡਾ ਮੀਆਂ ਘਰ ਨਹੀਂ, ਬੀਵੀ/ਬੀਬੀ ਕੂੰ ਕਾਹੀਂ ਦਾ ਡਰ ਨਹੀਂ।
(ਸਾਡਾ ਖਾਵੰਦ ਘਰ ਨਹੀਂ ਹੈ ਤਾਂ ਪਤਨੀ ਨੂੰ ਕੋਈ ਡਰ ਭਉ ਨਹੀਂ ਹੈ)
ਮੀਆਂ ਮਿੱਠੂ ਚਾਪਲੂਸ
ਅਜ ਕਲ ਨੇਕ ਸਲਾਹਾਂ ਦੀ ਨਹੀਂ ਮੀਆਂ ਮਿੱਠੂਆਂ ਦੀ ਚਲਦੀ ਹੇ।
(ਅਜ ਕਲ ਨੇਕ ਸਲਾਹਾਂ ਦੀ ਨਹੀਂ, ਚਾਪਲੂਸਾਂ ਦੀ ਚਲਦੀ ਹੈ)
ਮੀਸਣਾ: ਚੁਪ ਕੀਤਾ ਖੋਟਾ
ਮੀਸਣਾਂ ਬਣ ਕੇ ਬੈਠਾ ਰਾਂਧੈ, ਵੇਲੇ ਤੇ ਡਸੇ ਤਾਂ ਨਾਂ।
(ਚੁੱਪ ਕੀਤਾ ਖੋਟਾ ਬਣ ਕੇ ਬੈਠਾ ਰਹੂ, ਵੇਲੇ ਤੇ ਦਸੇ ਤਾਂ ਨਾਂ)
ਮੀਂਗਣਾ: ਬਕਰੀਆਂ ਦਾ ਮੱਲ
ਡੇਰਿਆਂ ਆਲੇ ਮਰੀਜ਼ਾਂ ਕੂੰ ਮੀਂਗਣਾ ਸੂਘੈਂਦੇ, ਧੂੰਆਂ ਚੜੈਂਦੇ ਹਿਨ।
(ਡੇਰਿਆਂ ਵਾਲੇ ਰੋਗੀ ਨੂੰ ਮੀਂਗਣ ਸੁੰਘਾਣ ਤੇ ਧੂੰਆਂ ਦੇਣ)
ਮੀਂਢੀਆ: ਮੇਢੀਆ
ਕੁੜੀ ਦੀ ਨਹਾਈ ਧੁਆਈ ਵੇਲੇ ਮੀਂਢੀਆਂ ਖੋਲਣ ਦੀ ਰੀਤ ਕਰਦੇ ਹਿਨ।
(ਕੁੜੀ ਦੀ ਨਹਾਈ ਧੁਆਈ ਵੇਲੇ ਮੇਢੀਆਂ ਖੋਲਣ ਦੀ ਰੀਤ ਕਰਦੇ ਨੇ)
ਮੁਹਾਰ: ਉਠ ਦੀ ਨਕੇਲ
ਮੇਲੇ ਵੈਂਦਾ ਪਿਐਂ, ਮੈਕੂੰ ਡੂ ਮੁਹਾਰਾਂ ਘਿਨਾ ਡੇਵੇਂ।
(ਮੇਲੇ ਚਲਿਆਂ, ਮੈਨੂੰ ਦੋ ਮੁਹਾਰਾਂ (ਉਠ ਦੀਆਂ ਨਕੇਲਾਂ) ਲਿਆ ਦੇਈਂ)
ਮੁਹਰੀ/ਮੋਹਰੀ: ਅਗੁਵਾਈ ਵਾਲਾ
ਮੁਹਰੀ/ਮੋਹਰੀ ਲਗਾ ਭਜ ਖਲੋਵੈ ਤਾਂ ਜੱਥਾ ਖਿੰਡ ਵੈਸੀ।
(ਅਗੁਵਾਈ ਵਾਲਾ ਭੱਜ ਖੜੇ ਤਾਂ ਜੱਥਾ ਖਿਲਰ ਜਾਊ)
(173)
