ਲਹਿੰਦੀ ਪੰਜਾਬੀ 'ਸ਼ਬਦ-ਕੋਸ਼'
ਚੰਡੋਲ: ਸਜਾਵਟੀ ਰੋਸ਼ਨੀ ਵਾਲੇ ਖਟੋਲੇ
ਡਿਵਾਲੀ ਤੇ ਵੰਨੀ ਵੰਨੀ ਦੇ ਚੰਡੋਲ ਜਗੈਂਦੇ ਹਿਨ।
(ਦਿਵਾਲੀ ਤੇ ਤਰ੍ਹਾਂ ਤਰ੍ਹਾਂ ਦੇ ਸਜਾਵਟੀ ਰੌਸ਼ਨ ਖਟੋਲੇ ਜਗਾਂਦੇ ਨੇ)
ਚੰਦਰਭਾਨ: ਚੰਦਰਾ
ਪਹਿਲੂ ਹੀ ਸਰਾਪੇ ਜੋੜੇ ਘਰ ਇਹ ਚੰਦਰਭਾਨ ਜੰਮ ਪਿਐ।
(ਪਹਿਲਾਂ ਦੀ ਦੁੱਖੀ ਜੋੜੇ ਘਰ ਇਹ ਚੰਦਰਾ ਜੰਮ ਪਿਆ ਹੈ)
ਚਣੇ: ਛੋਲੇ
ਚਣੇ ਚੰਗੇ ਥੀਂਦੇ ਪਏ ਹਨ ਤੇ ਚਾਨਣੀ ਡੰਡੇ ਮਾਰ ਗਈ।
(ਛੋਲੇ ਵਾਹਵਾ ਹੋ ਰਹੇ ਸੀ ਕਿ ਚਾਨਣੀ ਨੇ ਟਾਟਾਂ ਮਾਰ ਦਿਤੀਆਂ)
ਚੱਪਾ: ਚਾਰ ਉਂਗਲਾ ਜਿੰਨਾ
ਚੱਪਾ ਕ ਰੋਟੀ ਡੀਂਦੇ ਹਿਨ ਤੇ ਹੱਡ ਭੰਨਵੀਂ ਕਾਰ ਕਰੈਂਦੇ ਹਨ।
(ਚਾਰ ਉਂਗਲ ਜਿੰਨੀ ਰੋਟੀ ਦਿੰਦੇ ਨੇ ਤੇ ਹੱਡ ਭੰਨਵਾਂ ਕੰਮ ਲੈਂਦੇਨ)
ਚਬੀਨਾ: ਚਬਣਯੋਗ ਨਿਕਸੁਕ
ਮਰੂੰਡਾਂ ਤੇ ਫੁੱਲੇ ਲਾਹੀਂ ਚਬੀਨੇ ਦੇ ਕੰਮ ਆਸਿਨ।
(ਮਰੂੰਡਾ ਤੇ ਫੁੱਲੇ ਆਥਣੇ ਚਬਣ ਦਾ ਨਿਕਲੂਕ ਬਣਨਗੇ)
ਚੰਮਜੂ: ਚਮੜੀ ਦੀ ਜੂੰ
ਆਲਸੀ ਨਾਂ ਧਾਂਧੈ, ਨਾ ਧੂੰਧੈ. ਚੰਮ ਜੂੰਆਂ ਦਾ ਭਰਿਆ ਪਿਐ।
(ਸੁਸਤ ਜਣਾ ਨਾ ਨਹਾਵੇ ਨਾ ਧੋਵੇ, ਚਮੜੀ ਤੇ ਜੂੰਆਂ ਭਰੀਆਂ ਪਈਆਂ ਨੇ)
ਚਮਰਸ: ਜੁਤੀ ਦੀ ਲਾਗ
ਅੰਗੂਠੇ ਦੀ ਚਮਰਸ ਤੇ ਤੇਲ ਤੇ ਚਮੜੇ ਦਾ ਸਾੜ ਲਾ ਲੈ।
(ਅੰਗੂਠੇ ਦੀ ਜੁਤੀ ਲਾਗ ਤੇ ਤੇਲ ਤੇ ਚੰਮ-ਸੁਆਹ ਮਲ ਲੈ)
ਚਮਚੜਿਕ/ਚਮਚਿੱਠ: ਚਮਗਿਦੜ
ਬੂਹੇ ਢੋਏ ਰਹੇ ਤੇ ਚਾਮਚੜਿਕਾਂ/ਚਮਚਿੱਠਾਂ ਘਰ ਮਲ ਘਿਧੀ।
(ਬੂਹੇ ਬੰਦ ਰਹੇ ਤੇ ਚਮਗਿਦੜਾਂ ਘਰ ਮਲ ਲਿਆ ਹੈ)
ਚਮਰੱਖ/ਚਰਮੁੱਖ: ਤੱਕਲੇ ਦੀ ਚਮ ਦੀ ਠੱਲ੍ਹ
ਚਰਖਾ ਘਤਣ ਤੂੰ ਕੱਢਿਆ ਹੇ, ਚਰਖਾਂ/ਚਰਮਖਾਂ ਕਾਈ ਨਿਨ੍ਹ।
(ਚਰਖਾ ਕੱਤਣ ਨੂੰ ਕੱਢਿਆ ਹੈ, ਤੱਕਲੇ ਦੀਆਂ ਠਲਾਂ ਕੋਈ ਨਹੀਂ ਹਨ)
ਚਮਾਠ/ਚਾਟ: ਥੱਪੜ/ਚਪੇੜ
ਨਿਕੇ ਬਾਲਾਂ ਨੁੰ ਕੋਈ ਏਡੀ ਚਮਾਠ/ਚਾਟ ਕਡੋਂ ਮਾਰੀਦੀ ਹੈ।
(ਨਿਕੇ ਬਾਲਾਂ ਨੂੰ ਏਨਾਂ ਥੱਪੜ ਕਦ ਮਾਰੀਦਾ ਹੈ)
ਚਮੂਠੀ: ਚੂੰਢੀ
ਵੇ ਭੈੜਿਆ, ਕੂਲੇ ਮਾਸ ਦੇ ਚਮੂਠੀ ਮਾਰ ਕੇ ਲਹੁ ਕਢ ਡਿੱਤਈ।
(ਅੜਿਆ, ਕੂਲੇ ਮਾਸ ਤੇ ਚੂੰਢੀ ਵੱਡ ਕੇ ਲਹੂ ਕੱਢ ਦਿਤਾ ਹੈ)
(74)
