ਪੰਨਾ:ਲੋਕ ਸਿਆਣਪਾਂ - ਸੁਖਦੇਵ ਮਾਦਪੁਰੀ.pdf/184

ਵਿਕੀਸਰੋਤ ਤੋਂ
ਇਹ ਸਫ਼ਾ ਪ੍ਰਮਾਣਿਤ ਹੈ

ਸਾਹ ਲੈਣਾ-ਸਬਰ ਕਰਨਾ, ਉਡੀਕ ਕਰਨਾ।
ਸਾਹਾ ਬੱਝਣਾ-ਵਿਆਹ ਦਾ ਦਿਨ ਧਰਿਆ ਜਾਣਾ।
ਸਾਹੀਂ ਸਾਹ ਲੈਣਾ-ਬਹੁਤ ਪਿਆਰ ਕਰਨਾ।
ਸਾਹੋ ਸਾਹ ਹੋਣਾ-ਹਫ਼ ਜਾਣਾ, ਥਕਾਵਟ ਨਾਲ ਸਾਹ ਦਾ ਤੇਜ਼ ਚੱਲਣਾ।
ਸਾਖੀ ਭਰਨਾ-ਸਹਿਮਤੀ ਜ਼ਾਹਿਰ ਕਰਨੀ, ਪ੍ਰੋੜ੍ਹਤਾ ਕਰਨਾ।
ਸਾਂਗ ਕੱਢਣਾ-ਕਿਸੇ ਦੀ ਨਕਲ ਉਤਾਰਨਾ।
ਸਾਂਗ ਭਰਨਾ-ਵਖਾਵਾ ਕਰਨਾ।
ਸਾਂਗ ਰਚਨਾ-ਠੱਗੀ ਮਾਰਨ ਦੀ ਚਾਲ ਚੱਲਣੀ।
ਸਾਂਗ ਲਾਉਣੀ-ਕਿਸੇ ਨੂੰ ਚੜ੍ਹਾਉਣ ਲਈ ਉਹਦੀ ਨਕਲ ਉਤਾਰਨੀ।
ਸਾਂਝ ਗੰਢਣਾ-ਮਿੱਤਰਤਾ ਪਾਉਣੀ।
ਸਾਂਝ ਪਾਉਣਾ-ਭਾਈਵਾਲੀ ਪਾਉਣੀ, ਦੋਸਤੀ ਪਾਉਣੀ।
ਸਾਂਝਾ ਜੋਤਰਾ ਲਾਉਣਾ-ਰਲ਼ਕੇ ਮਿਹਨਤ ਨਾਲ ਕੰਮ ਕਰਨਾ, ਸਾਂਝਾ ਜ਼ੋਰ ਲਾਉਣਾ।
ਸਾਣ ਚਾੜ੍ਹਨਾ-ਤਿੱਖਾ ਕਰਨਾ, ਤੇਜ਼-ਤਰਾਰ ਕਰਨਾ।
ਸ਼ਾਨ ਨੂੰ ਵੱਟਾ ਲਾਉਣਾ-ਬਦਨਾਮੀ ਖੱਟਣੀ, ਬੇਇਜ਼ਤੀ ਕਰਵਾਉਣੀ।
ਸਾਬਤ ਕਦਮ ਰਹਿਣਾ-ਅਡੋਲ ਰਹਿਣਾ, ਆਪਣੇ ਅਸੂਲਾਂ ’ਤੇ ਕਾਇਮ ਰਹਿਣਾ।
ਸ਼ਾਮਤ ਹੋਣੀ-ਮਾਰ ਕੁਟਾਈ ਹੋਣੀ, ਬਹੁਤ ਦੁਖੀ ਹੋਣਾ, ਤੰਗ ਕੀਤੇ ਜਾਣਾ।
ਸਾਰ ਲੈਣਾ-ਖ਼ਬਰਸਾਰ ਲੈਣਾ, ਖ਼ਬਰ ਰੱਖਣੀ।
ਸਾਰੀ ਤਾਣੀ ਉਲਝੀ ਹੋਣੀ-ਸਮੁੱਚੇ ਪ੍ਰਬੰਧ ਦਾ ਵਿਗੜਿਆ ਹੋਣਾ, ਹਰ ਥਾਂ ਨੁਕਸ ਹੋਣੇ।
ਸਾੜ ਸਾੜ ਮਾਰਨਾ-ਕਿਸੇ ਨੂੰ ਚੁੱਭਵੇਂ ਬੋਲ ਬੋਲ ਕੇ ਸਤਾਉਣਾ।
ਸਿਆਹੀ ਸਫ਼ੈਦੀ ਕਰਨਾ-ਆਪਣੀ ਮਰਜ਼ੀ ਵਰਤਣੀ, ਪੂਰੇ ਅਖ਼ਤਿਆਰ ਹੋਣਾ।
ਸਿਆਪਾ ਪਾਉਣਾ-ਝਗੜੇ ਵਾਲ਼ਾ ਕੰਮ ਸਹੇੜਨਾ, ਵੱਟਾ ਪਾਉਣਾ, ਵਖ਼ਤ ਪਾਉਣਾ।
ਸਿਆਪਾ ਮਕਾਉਣਾ-ਕਿਸੇ ਮਨ ਚਿਤ ਨਾ ਲੱਗਦੀ ਗੱਲ ਦਾ ਸਦਾ ਲਈ ਖਿਹੜਾ ਛੱਡ ਦੇਣਾ।
ਸਿੱਕ ਪੈ ਜਾਣੀ-ਤਾਂਘ ਲੱਗ ਜਾਣੀ।
ਸਿੱਕਾ ਮੰਨਣਾ-ਜ਼ੋਰ ਜਾਂ ਸੁੰਦਰਤਾ ਵਿੱਚ ਦੂਜੇ ਨੂੰ ਆਪਣੇ ਨਾਲ਼ੋ ਵਧੀਆ ਮੰਨਣਾ।

ਲੋਕ ਸਿਆਣਪਾਂ/182