ਇਹ ਸਫ਼ਾ ਪ੍ਰਮਾਣਿਤ ਹੈ
ਤੇਰਾ ਦਿੱਤਾ ਜ਼ਖ਼ਮ ਮੈਂ ਕਿਹੜਾ ਜਰਿਆ ਨਹੀਂ।
ਗੱਲ ਵੱਖਰੀ ਹੈ, ਤੇਰਾ ਹੀ ਦਿਲ ਭਰਿਆ ਨਹੀਂ।
ਵਰਕਾ ਵਰਕਾ ਪਾੜਨ ਵਾਲੇ ਕਿੱਧਰ ਗਏ,
ਹਰ ਦੁਸ਼ਮਣ ਤੋਂ ਸ਼ਬਦ ਕਦੇ ਵੀ ਹਰਿਆ ਨਹੀਂ।
ਹਮਲਾਵਰ ਦੇ ਏਨੇ ਹਮਲੇ, ਕੀ ਦੱਸਾਂ,
ਅੱਜ ਤੱਕ ਮੈਂ ਵੀ ਪੈਰ ਪਿਛਾਂਹ ਨੂੰ ਧਰਿਆ ਨਹੀਂ।
ਮਾਰਨ ਤੀਰ ਨਿਸ਼ਾਨੇ ਦੀ ਥਾਂ 'ਨੇਰ੍ਹੇ ਵਿੱਚ,
ਹੁਣ ਤੱਕ ਤਾਂਹੀਉਂ, ਇੱਕ ਵੀ ਰਾਵਣ ਮਰਿਆ ਨਹੀਂ।
ਜ਼ਿੰਦਗੀ ਨਾਲੋਂ ਮੌਤ ਪਿਆਰੀ ਸਮਝਣ ਜੋ,
ਆਜ਼ਾਦੀ ਨੂੰ ਉਹਨ੍ਹਾਂ ਤੋਂ ਬਿਨ ਵਰਿਆ ਨਹੀਂ।
ਦਾਅਵੇਦਾਰ ਬਥੇਰੇ ਸੁਖ ਦੇ ਸਾਥ ਬੜੇ,
ਦਰਦ ਸਮੁੰਦਰ ਸਾਡੇ ਤੋਂ ਬਿਨ ਤਰਿਆ ਨਹੀਂ।
ਧਰਤ ਪਿਆਸੀ ਤਰਸ ਗਈ ਘੱਟ ਪਾਣੀ ਨੂੰ,
ਭਰ ਕੇ ਵਗਦਾ ਹੁਣ ਤੇ ਇੱਕ ਵੀ ਦਰਿਆ ਨਹੀਂ।
149