ਪੰਨਾ:ਹੀਰ ਵਾਰਸਸ਼ਾਹ.pdf/9

ਵਿਕੀਸਰੋਤ ਤੋਂ
Jump to navigation Jump to search
ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ

(੭)

ਕਲਾਮ ਭਾਬੀਆਂ

ਅਠਖੇਲਿਆ ਅਹਿਲ ਦੀਵਾਨਿਆ ਵੇ ਥੁੱਕਾਂ ਮੋਢਿਆਂ ਦੇ ਉੱਤੋਂ ਸੱਟਨਾ ਏਂ
ਚੀਰਾ ਬੰਨ੍ਹ ਕੇ ਲੰਬੜੇ ਵਾਲ ਚੋਪੜ ਵਿੱਚ ਤ੍ਰਿਞਣਾਂ ਫੇਰੀਆਂ ਘੱਤਨਾ ਏਂ
ਰੋਟੀ ਖਾਂਦਿਆਂ ਲੂਣ ਦੇ ਪਵੇ ਥੋੜਾ ਚਾ ਅੰਗਣੇ ਵਿਚ ਪਲੱਟਨਾ ਏਂ
ਕਰੇਂ ਕੰਮ ਨਾਹੀਂ ਹੱਛਾ ਖਾਏਂ ਪਹਿਨੇਂ ਜੜ੍ਹ ਆਪਣੇ ਆਪ ਦੀ ਪੱਟਨਾ ਏਂ
ਵਾਂਗ ਹਾਕਮਾਂ ਢਾਸਣਾ ਲਾ ਬਹੇਂ ਕੁਝ ਕੰਮ ਨਾ ਕਾਜ ਨਾ ਖੱਟਨਾ ਏਂ
ਵਾਰਸ ਗਫ਼ਲਤਾਂ ਵਿੱਚ ਨਾਬੂਦ ਜਿਹੜੇ ਤਿਨ੍ਹਾਂ ਆਪ ਕੀ ਖੱਟਨਾ ਵੱਟਨਾ ਏਂ

ਕਲਾਮ ਰਾਂਝਾ

ਭੁਲ ਗਏ ਹਾਂ ਵੜੇ ਹਾਂ ਆਣ ਵਿਹੜੇ ਸਾਨੂੰ ਬਖ਼ਸ਼ ਲੈ ਡਾਰੀਏ ਵਾਸਤਾ ਈ
ਹੱਥੋਂ ਤੇਰਿਓਂ ਦੇਸ ਮੈਂ ਛੱਡ ਜਾਈਂ ਵੱਸੀਂ ਦੇਸ ਹੈਂਸਿਆਰੀਏ ਵਾਸਤਾ ਈ
ਦਿਨ ਰਾਤ ਤੇ ਜ਼ੁਲਮ ਤੇ ਲੱਕ ਬੱਧਾ ਮੁੜੀਂ ਰੂਪ ਸ਼ਿੰਗਾਰੀਏ ਵਾਸਤਾ ਈ
ਨਾਲ ਹੁਸਨ ਦੇ ਫਿਰੇਂ ਗ਼ੁਮਾਨ ਲੱਦੀ ਸਮਝ ਮਸਤ ਹੰਕਾਰੀਏ ਵਾਸਤਾ ਈ
ਕਦੇ ਕਿਸੇ ਦੇ ਨਾਲ ਨਾ ਗੱਲ ਕਰੇਂ, ਕਿਬਰ ਵਾਲੀਏ ਮਾਰੀਏ ਵਾਸਤਾ ਈ
ਵਾਰਸਸ਼ਾਹ ਨੂੰ ਮਾਰ ਨਾ ਭਾਗ ਭਰੀਏ ਅਨੀ ਮੁਣਸ ਦੀ ਪਯਾਰੀਏ ਵਾਸਤਾ ਈ

ਕਲਾਮ ਭਾਬੀਆਂ

ਸਾਡਾ ਹੁਸਨ ਪਸੰਦ ਨਾ ਲਿਆਵਨਾ ਏਂ ਜਾਹ ਹੀਰ ਸਿਆਲ ਵਿਆਹ ਲਿਆਵੀਂ
ਵਾਹ ਵੰਝਲੀ ਪ੍ਰੇਮ ਦੀ ਘੱਤ ਜਾਲੀ ਕਾਈ ਨੱਢੀ ਸਿਆਲਾਂ ਦੀ ਫਾਹ ਲਿਆਵੀਂ
ਦਿਹੇਂ ਰਾਤ ਫਿਰੀਂ ਉਹਦੇ ਮਗਰ ਲੱਗਾ ਜਿਵੇਂ ਦਾ ਲਗੇ ਤਿਵੇਂ ਲਾ ਲਿਆਵੀਂ
ਤੈਨੂੰ ਵੱਲ ਹੈ ਰੰਨਾਂ ਵਲਾਵਣੇ ਦਾ ਰਾਣੀ ਕੋਕਲਾਂ ਮਹਿਲਾਂ ਤੋਂ ਲਾਹ ਲਿਆਵੀਂ
ਦਿਨੇ ਬੂਹਿਓਂ ਕੱਢਣੀ ਮਿਲੇ ਨਾਹੀਂ ਰਾਤੀਂ ਕੰਧ ਪਛਵਾੜਿਉਂ ਢਾਹ ਲਿਆਵੀਂ
ਵਾਰਸਸ਼ਾਹ ਨੂੰ ਨਾਲ ਲੈ ਜਾਇਕੇ ਤੇ ਕੋਈ ਦੱਮ ਦੇ ਕੇ ਖਿਸਕਾ ਲਿਆਵੀਂ

ਕਲਾਮ ਰਾਂਝਾ

ਨੱਢੀਸਿਆਲਾਂ ਦੀਵਿਆਹਕੇ ਲਿਆਵਸਾਂ ਮੈਂ ਕਰੋ ਬੋਲੀਆਂ ਨਾਲ ਨਾ ਹੋਲੀਆਂ ਨੀ
ਬਹੇ ਘਤ ਪੀੜ੍ਹਾ ਵਾਂਗ ਰਾਣੀਆਂ ਦੇ ਅਗੇ ਤੁਸਾਂ ਜਿਹੀਆਂ ਹੋਵਣ ਗੋਲੀਆਂ ਨੀ
ਮਝੂ ਵਾਹ ਵਿਚ ਬੋੜੀਏ ਭਾਬੀਆਂ ਨੂੰ ਹੋਣ ਤੁਸਾਂ ਜਿਹੀਆਂ ਬੱੜਬੋਲੀਆਂ ਨੀ
ਬੱਸ ਕਰੋ ਭਾਈ ਅਸੀਂ ਰੱਜ ਰਹੇ ਭੱਰ ਦਿਤੀਆਂ ਦੇ ਸਾਨੂੰ ਝੋਲੀਆਂ ਨੀ
ਨਕਲਾਂ ਨਿਤ ਕਰੋ ਵਿਚ ਵਹੜਿਆਂ ਦੇ ਭੰਡਾਂ ਕੰਜਰੀਆਂ ਦੀਆਂ ਜਿਵੇਂ ਟੋਲੀਆਂ ਨੀ
ਵਾਰਸ ਆਕਬਤ ਤਿਨ੍ਹਾਂ ਨੂੰ ਅਜ਼ਰ ਮਿਲਮੀ ਪੂਰੇ ਪਾ ਵੱਟੇ ਜਿਨ੍ਹਾਂ ਤੋਲੀਆਂ ਨੀ

ਭਰਜਾਈਆਂ ਦੀ ਬੋਲੀ ਤੇ ਰਾਂਝੇ ਦਾ ਘਰੋਂ ਨਿਕਲਣਾ

ਕਿਹਾ ਭੇੜ ਮਚਾਇਆ ਈ ਕੱਚਿਆ ਵੇ ਮੱਥਾ ਡਾਹਿਆ ਈ ਸੌਂਕਣਾਂ ਵਾਂਗ ਕੇਹਾ