ਆਕਾਸ਼ ਉਡਾਰੀ/ਜੇ ਮੈਂ ਹੁੰਦਾ 'ਤਾਰਾ'

by ਮਾ. ਤਾਰਾ ਸਿੰਘ ਤਾਰਾ

⁠ਜੇ ਮੈਂ ਹੁੰਦਾ 'ਤਾਰਾ'

ਕਿਹਾ ਚੰਗਾ ਹੁੰਦਾ, ਹੁੰਦਾ ਮੈਂ 'ਤਾਰਾ'
ਵਾਸਾ ਮੇਰਾ ਭੀ ਵਿਚ ਅਸਮਾਨ ਹੁੰਦਾ।
ਤੇਰੇ ਬਿਰਹੋਂ 'ਚ ਤੜੱਪਦਾ ਰਾਤ ਸਾਰੀ,
ਤੇਰੇ ਚਰਨਾਂ 'ਚ ਮੇਰਾ ਧਿਆਨ ਹੁੰਦਾ।
ਮੇਰੇ ਪ੍ਰੀਤਮਾਂ ਤੇਰੀ ਹੀ ਭਾਲ ਅੰਦਰ,
ਦਿਨ ਚੜ੍ਹੇ ਮੈਂ ਕਿਧਰੇ ਰਵਾਨ ਹੁੰਦਾ।
ਤੇਰੀ ਰਚਨਾਂ ਵੇਖ ਵਿਸਮਾਦ ਹੁੰਦਾ,
ਤੇਰੀ ਖੇਡ ਮੈਂ ਵੇਖ ਹੈਰਾਨ ਹੁੰਦਾ।
ਭਾਵੇਂ ਦੁਨੀਆਂ ਵਿਚ ਅੰਧੇਰ ਹੁੰਦਾ,
ਮੇਰੇ ਹਿਰਦੇ 'ਚ ਚਾਨਣ ਗਿਆਨ ਹੁੰਦਾ।
ਤੇਰੀ ਯਾਦ ਵਿਚ ਜਾਗਦਾ ਮੈਂ ਹੁੰਦਾ,
ਜਦੋਂ ਸੁਤਾ ਹੋਇਆ ਸਾਰਾ ਜਹਾਨ ਹੁੰਦਾ।