ਕੌਡੀ ਬਾਡੀ ਦੀ ਗੁਲੇਲ/ਹਥਣੀ ਦਾ ਚਰਖਾ
ਹਥਣੀ ਦਾ ਚਰਖਾ
ਜੰਗਲ ਦੇ ਵਿੱਚ ਹੋਈ ਚਰਚਾ।
ਹੱਥਣੀ ਰਾਣੀ ਲਿਆਂਦਾ ਚਰਖਾ।
ਕੱਢ ਕੇ ਦਿਲ ਦੇ ਵਿੱਚੋਂ ਸੀ ਡਰ।
ਦੇਖਣ ਆਏ ਸਾਰੇ ਜਾਨਵਰ।
ਹਥਣੀ ਦੇ ਹੋਏ ਆਲੇ ਦੁਆਲੇ।
ਕਹਿੰਦੇ ਹੋਗੇ ਅੱਜ ਕਮਾਲੇ।
ਹਥਣੀ ਨੂੰ ਪਏ ਦੇਣ ਵਧਾਈਆਂ।
ਦੱਸ ਕਿੱਥੋਂ ਇਹ ਦਾਤਾਂ ਪਾਈਆਂ?
ਕਹਿੰਦੀ ਮੇਰੇ ਮਾਪਿਆਂ ਦਿੱਤਾ।
ਮੇਰੇ ਤੇ ਉਪਕਾਰ ਹੈ ਕੀਤਾ।
ਕਹਿੰਦੇ ਧੀਏ ਰਹੀਂ ਨਾ ਵੇਹਲੀ।
ਕਾਮੇ ਦਾ ਹੈ ਅੱਲਾ ਬੇਲੀ।
ਚੰਗਾ ਹੁਣ ਮੈਂ ਚਰਖਾ ਡਾਹਲਾਂ।
ਕੱਤਾਂ ਪੂਣੀ ਗਲੋਟੇ ਲਾਹ ਲਾਂ।
ਜਦ ਹਥਣੀ ਨੇ ਦਿੱਤੀ ਗੇੜੀ।
ਜੰਗਲ ਦੇ ਵਿੱਚ ਆਈ ਹਨੇਰੀ।
ਗੂੰਜ ਪਈ ਜਦ ਚਾੜ੍ਹੀ ਤੰਦ।
ਕੰਨ ਹੋਏ ਸਭਨਾਂ ਦੇ ਬੰਦ।
ਅੱਗੇ ਪਿੱਛੇ ਭੱਜੀ ਜਾਵਣ।
ਇੱਕ ਦੂਜੇ ਵਿੱਚ ਵੱਜੀ ਜਾਵਣ।
ਸਾਰੇ ਮੱਚਗੀ ਹਾਹਾਕਾਰ।
ਬਖਸ਼ੀਂ ਦੇਵੀ ਕਰਨ ਪੁਕਾਰ।
ਹਥਣੀ ਨੇ ਜਦ ਰੋਕੀ ਬਾਂਹ।
ਸਭ ਦੇ ਆਏ ਸਾਹ ਵਿੱਚ ਸਾਹ।