ਪੰਨਾ:ਕਾਫ਼ੀਆਂ ਸ਼ਾਹ ਹੁਸੈਨ - ਚਰਨ ਪਪਰਾਲਵੀ.pdf/35

ਵਿਕੀਸਰੋਤ ਤੋਂ
Jump to navigation Jump to search
ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ


ਇੱਕ ਰੋਂਦੇ ਰੋਂਦੇ ਹੋਇ ਗਏ,
ਇੱਕ ਹਸਿ ਹਸਿ ਲੈ ਗਏ ਗੋਇ ਮੈਦਾਨੋਂ।

ਛੋਡਿ ਤਕੱਬਰੀ ਪਕੜਿ ਹਲੀਮੀ,
ਕੀ ਵਟਿਓ ਇਸ ਖੁਦੀ ਗੁਮਾਨੋਂ।

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,
ਸਹੀ ਸਲਾਮਤਿ ਚਲੇ ਜਹਾਨੋਂ।

(48)



ਕੈ ਬਾਗੇ ਦੀ ਮੂਲੀ ਹੁਸੈਨਾ,
ਤੂੰ ਕੇ ਬਾਗੈ ਦੀ ਮੂਲੀ।
ਬਾਗਾਂ ਦੇ ਵਿਚ ਫੁਲਿ ਅਜਾਇਬ
ਤੂੰ ਬੀ ਇੱਕ ਗੰਧੂਲੀ।
 
ਆਪਣਾ ਆਪਿ ਪਛਾਣੇ ਨਾਹੀਂ,
ਅਵਰਾਂ ਦੇਖਿ ਕਿਉਂ ਭੂਲੀ।

ਇਸ਼ਕੇ ਦੇ ਦਰਿਆਉ ਕਰਾਹੀ,
ਮਨਸੂਰ ਕਬੂਲੀ ਸੂਲੀ।

ਸ਼ਾਹ ਹੁਸੈਨ ਪਇਆ ਦਰਿ ਉਤੇ
ਜੇਕਰ ਪਵੈ ਕਬੂਲੀ।

ਪਾਠਾਂਤਰ (48)



ਹੁਸੈਨੂੰ ਕਿਸੇ ਬਾਗੇ ਦੀ ਮੂਲੀ,
ਬਾਗਾਂ ਦੇ ਵਿਚ ਚੰਬਾ ਮੁਰੂਆ,
ਮੈਂ ਭਿ ਵਿਚਿ ਗੰਧੂਲੀ।
ਕੂੜੀ ਦੁਨੀਆਂ ਕੁੜਾ ਮਾਣਾ,
ਦੁਨੀਆਂ ਫਿਰਦੀ ਭੂਲੀ।
ਛੋਡ ਤਕੱਬਰ ਪਕੜ ਹਲੀਮੀ,
ਸ਼ਾਹ ਹੁਸੈਨ ਪਾਇ ਸਮਝੂਲੀ।

33