ਪੰਨਾ:ਬੋਲੀਆਂ ਦਾ ਪਾਵਾਂ ਬੰਗਲਾ - ਸੁਖਦੇਵ ਮਾਦਪੁਰੀ.pdf/272

ਵਿਕੀਸਰੋਤ ਤੋਂ
Jump to navigation Jump to search
ਇਹ ਸਫ਼ਾ ਪ੍ਰਮਾਣਿਤ ਹੈ




ਸੀਟੀ ਮਾਰ ਬੁਲਾਈਆਂ
ਹੁਣ ਕਿਉਂ ਰੋਨੀ ਏਂ-
ਹਾਣ ਦੇ ਮੁੰਡੇ ਨਾਲ ਲਾਈਆਂ

ਢਾਈਆਂ ਢਾਈਆਂ ਢਾਈਆਂ

ਮੂਰਖ ਲੋਕਾਂ ਨੇ
ਕੁੜੀਆਂ ਪੜ੍ਹਨ ਬਠਾਈਆਂ
ਠਾਰਾਂ ਠਾਰਾਂ ਸਾਲ ਦੀਆਂ
ਨਾ ਮੰਗੀਆਂ ਨਾ ਵਿਆਹੀਆਂ
ਅਠਵੇਂ ਦਿਨ ਦੀ ਛੁੱਟੀ ਆਉਂਦੀਆਂ
ਕਪੜੇ ਧੋਣ ਨਹਿਰ ਤੇ ਆਈਆਂ
ਗੋਹਾ ਕੂੜਾ ਕੀ ਕਰਨਾ
ਉਹਨਾਂ ਭੀੜੀਆਂ ਜਾਕਟਾਂ ਪਾਈਆਂ
ਟੁੱਟੀਆਂ ਦੋਸਤੀਆਂ-
ਰਾਸ ਕਦੇ ਨਾ ਆਈਆਂ

ਮੁੰਡਿਆਂ ਵਿਚੋਂ ਮੁੰਡਾ ਛਾਂਟਿਆ

ਮੁੰਡਾ ਛਾਂਟਿਆ ਪਾਲੀ
ਪਹਿਲਾਂ ਉਹਨੇ ਕਿੱਕਰ ਬੇਚਲੀ
ਮਗਰੋਂ ਬੇਚਲੀ ਟਾਹਲੀ
ਸਾਰੇ ਘਰ ਦੇ ਦਾਣੇ ਬੇਚਲੇ
ਹੋ ਗੀ ਗਵਾਰੀ ਖਾਲੀ
ਲਾ ਕੇ ਦੋਸਤੀਆਂ-
ਉਡਗੀ ਬੁੱਲ੍ਹਾਂ ਦੀ ਲਾਲੀ

ਧਾਵੇ ਧਾਵੇ ਧਾਵੇ

ਝਿੜਕਿਆ ਮਾਪਿਆਂ ਦਾ
ਮੇਰਾ ਯਾਰ ਰੋਟੀ ਨਾ ਖਾਵੇ
ਰੋਟੀ ਖਾ ਯਾਰਾ
ਤੇਰੇ ਲਾਹਦੂੰ ਉਲਾਂਭੇ ਸਾਰੇ
ਬਾਹੀਆਂ ਸਾਲ ਦੀਆਂ
ਲਾਲ ਚੰਨਣ ਦੇ ਪਾਵੇ

270 - ਬੋਲੀਆਂ ਦਾ ਪਾਵਾਂ ਬੰਗਲਾ