ਪੰਨਾ:ਮਾਨ-ਸਰੋਵਰ.pdf/176

ਵਿਕੀਸਰੋਤ ਤੋਂ
Jump to navigation Jump to search
ਇਹ ਸਫ਼ਾ ਪ੍ਰਮਾਣਿਤ ਹੈ



ਪ੍ਰਭਾਤ ਝਾਤ


ਛਾਤੀ ਤਾਣ ਕੇ ਕੁੱਕੜ ਨੇ ਬਾਂਗ ਦਿੱਤੀ,
ਇਕੇ ਜੰਗ ਦਾ ਨਾਦ ਘੁਕਾਇਆ ਸੀ।
ਕਾਲੀ ਰਾਤ ਦੇ ਬਖ਼ਤ ਸਿਆਹ ਉਤੇ,
ਆ ਪ੍ਰਭਾਤ ਨੇ ਕਟਕ ਚੜ੍ਹਾਇਆ ਸੀ।

ਹੋਈਆਂ ਟੱਕਰਾਂ ਪੂਰਬੀ ਮੋਰਚੇ ਤੇ,
ਜੰਗ ਮਚਿਆ ਬੜੇ ਘਮਸਾਨ ਅੰਦਰ।
ਲਾਲੀ ਆਣ ਅਸਮਾਨ ਨੂੰ ਚੜ੍ਹਨ ਲੱਗੀ,
ਐਨਾ ਡੁਲ੍ਹਿਆ ਲਹੂ ਮੈਦਾਨ ਅੰਦਰ।

ਹਾਰ ਖਾ ਕੇ ਮੰਨ ਗਈ ਈਨ ਜਾਪੇ,
ਬੁਢੀ ਰਾਤ ਨੇ ਬਿਸਤਰਾ ਗੋਲ ਕੀਤਾ।
ਜਿਤੇ ਦੇਸ ਦੇ ਵਿਚ ਪ੍ਰਭਾਤ ਰਾਣੀ,
ਆਸਣ ਤਖ਼ਤ ਤੇ ਆਣ ਅਡੋਲ ਕੀਤਾ।

-੧੭੩-