ਇਹ ਪੰਨਾ ਪ੍ਰਮਾਣਿਤ ਕੀਤਾ ਗਿਆ ਹੈ
ਹੁਣ ਪਰ ਪੰਥ ਖਾਲਸਾ ਤੈਨੂੰ,
ਏਸ ਤਰ੍ਹਾਂ ਹੈ ਹੁਕਮ ਸੁਣਾਂਦਾ ।
ਏਸ ਗੜ੍ਹੀ ਦੇ ਵਿਚੋਂ ਛੇਤੀ,
ਆਪਣਾ ਆਪ ਬਚਾ ਕੇ ਲੈ ਜਾ।
ਭਾਵੇਂ ਭੇਸ ਵਟਾ ਕੇ ਲੈ ਜਾ।
ਭਾਵੇਂ ਤੇਗ਼ ਵਿਖਾ, ਕੇ ਲੈ ਜਾ।
ਪਰ ਤੂੰ ਏਸ ਹੁਕਮ ਨੂੰ ਸੁਣ ਕੇ,
ਦੋ ਅੱਖਰ ਵੀ ਕਹਿ ਨਹੀਂ ਸਕਦਾ।
ਹੁਣ ਤੂੰ ਜੂਝਣ ਖ਼ਾਤਰ ਪਲ ਵੀ,
ਏਸ ਗੜ੍ਹੀ ਵਿਚ ਰਹਿ ਨਹੀਂ ਸਕਦਾ।
ਝਟ ਪਟ ਓਹਨਾਂ ਲਾਲ ਅੱਖਾਂ ਤੇ,
ਪੈ ਗਏ ਸਨ ਪਲਕਾਂ ਦੇ ਪਰਦੇ ।
ਜਿਓਂ ਦਰਬਾਰੀ ਸ਼ਾਹ ਅਪਣੇ ਦਾ,
ਝੁਕ ਝੁਕ ਕੇ ਨੇ ਆਦਰ ਕਰਦੇ ।
ਕਲਗੀ ਵਾਲੇ ਸੀਸ ਆਪਣਾ,
ਹੈਸੀ ਇੰਜ ਝੁਕਾਇਆ ਹੋਇਆ ।
ਜਿਓਂ ਸ਼ਾਹਾਂ ਦੇ ਸ਼ਾਹ ਦੇ ਅੱਗੇ,
ਕੋਈ ਮਾਤਹਿਤ ਆਣ ਖਲੋਇਆ ।
ਤਿੰਨ ਸਿੰਘਾਂ ਨੂੰ ਲੈ ਕੇ ਲੈ ਟੁਰਿਆ,
ਪੀਰ ਹਿੰਦ ਦਾ ਬਣਿਆ ਤਣਿਆਂ !
ਮੂੰਹ ਵਿਚ ਉਂਗਲਾਂ ਪਾ ਗਈ ਦੁਨੀਆ,
ਪੰਥ ਗੁਰੁ ਗੁਰ ਚੇਲਾ ਬਣਿਆ ।"
- ੫੮ -
