ਆਕਾਸ਼ ਉਡਾਰੀ/ਤੇਰੇ ਨੈਣਾਂ ਦੇ ਤੀਰ

ਵਿਕੀਸਰੋਤ ਤੋਂ
ਨੈਵੀਗੇਸ਼ਨ 'ਤੇ ਜਾਓ ਸਰਚ ਤੇ ਜਾਓ

ਤੇਰੇ ਨੈਣਾਂ ਦੇ ਤੀਰ

ਵੱਡੇ ਵੱਡੇ ਜੋਧੇ, ਵੱਡੇ ਰੋਹਬ ਵਾਲੇ,
ਵੱਡੇ ਧਨਖ ਧਾਰੀ ਤੇ ਜਵਾਨ ਲਖਾਂ।
ਤੀਰ ਮਾਰ ਕੇ ਪੱਥਰਾਂ ਵਿੰਨ੍ਹਣ ਵਾਲੇ,
ਵੇਖੇ ਸੂਰਮੇ ਬਲੀ ਬਲਵਾਨ ਲਖਾਂ।
ਸੈਨਾਂ ਲਸ਼ਕਰਾਂ ਨਾਲ ਸੀ ਰਾਜ ਜਿਤਿਆ,
ਐਸੇ ਹੋ ਗੁਜ਼ਰੇ ਹੁਕਮਰਾਨ ਲਖਾਂ।
ਤਖ਼ਤਾਂ ਤਾਜਾਂ ਤੇ ਮਾਲਕ ਵਲਾਇਤਾਂ ਦੇ,
ਡਿਠੇ ਸੂਰਮੇ ਬਲੀ ਬਲਵਾਨ ਲਖਾਂ।

ਬਾਣ ਬਾਣੀ ਦੇ ਮਾਰ ਕੇ ਜਿਤਣ ਵਾਲਾ,
ਬਲੀਆਂ ਬਲੀ ਹੈਸੀ ਬੀਰਾਂ ਬੀਰ ਨਾਨਕ।
ਲਖਾਂ ਦਿਲਾਂ ਦਾ ਜਿਤਿਆ ਰਾਜ ਸੀਗਾ,
ਇਕੋ ਨਿਗ੍ਹਾ ਦਾ ਮਾਰ ਕੇ ਤੀਰ ਨਾਨਕ।

ਕੌੜ ਰੇਠਿਆਂ ਦੀ ਝਟ ਦੂਰ ਕੀਤੀ,
ਐਸਾ ਬਾਣੀ ਦੇ ਵਿਚ ਕੋਈ ਸ਼ੀਰ ਹੈਸੀ।
ਪਰਬਤ ਪਿਘਲ ਕੇ ਪਾਣੀ ਦੇ ਵਾਂਗ ਹੋਏ,
ਐਸੀ ਨਜ਼ਰ ਦੇ ਵਿੱਚ ਤਾਸੀਰ ਹੈਸੀ।
ਪਾਪੀ ਚਰਨਾਂ ’ਚ ਡਿੱਗਦੇ ਘਾਇਲ ਹੋ ਕੇ,
ਐਸੀ ਨੈਣਾਂ ਦੀ ਤੇਜ਼ ਸ਼ਮਸ਼ੀਰ ਹੈਸੀ।

ਬਾਬਰ ਜਿਹੇ ਵੀ ਤੇਰੇ ਮੁਰੀਦ ਬਣ ਗਏ,
ਐਸੀ ਪ੍ਰੇਮ ਦੀ ਤੇਰੀ ਜ਼ੰਜੀਰ ਹੈਸੀ।

ਵਾਂਗ 'ਤਾਰਿਆਂ' ਦੇ ਕੀਤੇ ਦਿਲ ਰੌਸ਼ਨ,
ਚਮਕੇ ਚੰਨ ਤੋਂ ਵਧ ਤਸਵੀਰ ਨਾਨਕ।
ਲੱਖਾਂ ਦਿਲਾਂ ਦਾ ਜਿਤਿਆ ਰਾਜ ਸੀਗਾ,
ਇਕੋ ਨਿਗ੍ਹਾ ਦਾ ਮਾਰ ਕੇ ਤੀਰ ਨਾਨਕ।