ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
ਗੀਤਾਂਜਲੀ
੭੩ਵੀਂ ਕੂੰਜ
ਤਿਆਗ ਮੇਰੇ ਲਈ ਮੁਕਤੀ ਨਹੀਂ ਹੈ, ਮੈਨੂੰ ਤਾਂ ਅਨੰਦ ਦੇ ਹਜ਼ਾਰਾਂ ਬੰਧਨਾਂ ਵਿਚੋਂ ਮੁਕਤੀ ਦਾ ਰਸ ਆਉਂਦਾ ਹੈ।
ਤੂੰ ਮੇਰੇ ਲਈ ਹਮੇਸ਼ਾਂ ਅਨੇਕਾਂ ਰੰਗਾਂ ਤੇ ਸੁਗੰਧੀਆਂ ਦੇ ਅੰਮ੍ਰਿਤ ਦੀ ਬਾਰਸ਼ ਕਰਦਾ ਏਂ, ਮੇਰੇ ਇਸ ਮਿੱਟੀ ਦੇ ਭਾਂਡੇ ਨੂੰ ਕੰਢਿਆਂ ਤਕ ਭਰ ਦਿੰਦਾ ਏਂ।
ਮੇਰਾ ਸੰਸਾਰ ਆਪਣੇ ਸੈਂਕੜੇ ਦੀਵਿਆਂ ਨੂੰ ਤੇਰੀ ਜੋਤੀ ਨਾਲ ਜਗਾਇਆ ਕਰੇਗਾ ਅਤੇ ਤੇਰੇ ਮੰਦਰ ਦੀ ਵੇਦੀ ਪਰ ਉਨ੍ਹਾਂ ਨੂੰ ਚੜਾਵੇਗਾ। ਨਹੀਂ, ਮੈਂ ਆਪਣੀਆਂ ਇੰਦਰੀਆਂ ਦੇ ਦਰਵਾਜੇ ਕਦੀ ਨ ਬੰਦ ਕਰਾਂਗਾ, ਸ਼ਬਦ, ਛੂਹ, ਰੂਪ, ਰਸ, ਸੁਗੰਧੀ ਦਾ ਸੁਖ ਤੇਰੇ ਮਹਾ ਅਨੰਦ ਨੂੰ ਪੈਦਾ ਕਰੇਗਾ।
ਹਾਂ, ਮੇਰੇ ਸਾਰੇ ਵਹਿਮ ਤੇ ਸ਼ੰਕੇ ਤੇਰੇ ਅਨੰਦ ਦੀ ਜੋਤੀ ਵਿਚ ਭਸਮ ਹੋ ਜਾਣਗੇ ਅਤੇ ਮੇਰੀਆਂ ਸਭ ਵਾਸ਼ਨਾਵਾਂ ਪ੍ਰੇਮ ਦੇ ਫਲਾਂ ਵਿਚ ਬਦਲ ਜਾਣਗੀਆਂ।
੯੬
