ਪੰਨਾ:ਗੈਂਡੇ - ਯੂਜੀਨ ਆਇਨੈਸਕੋ - ਬਲਰਾਮ.pdf/85

ਹੈ।) ਹਾਂ, ਹੁਣ ਕੁਝ ਠੀਕ ਲੱਗ ਰਿਹਾ।

ਡਯੂਡਾਰਡ :

ਮੇਰੀ ਅਵਾਜ਼ ਤਾਂ ਪਹਿਲੋਂ ਵਰਗੀ ਹੀ ਹੈ। ਮੈਂ ਤਾਂ ਤੇਰੀ ਝੱਟ ਪਛਾਣ ਲਈ ਸੀ।

ਬੇਰੰਜਰ:

ਸੌਰੀ, ਮੈਨੂੰ ਲੱਗਾ ਕਿ..., ਹਾਂ ਤੁਸੀਂ ਸਹੀ ਹੋ, ਤੁਹਾਡੀ ਅਵਾਜ਼ ਤਾਂ ਬਿਲਕੁਲ ਨਾਰਮਲ ਹੈ। ਮੇਰੀ ਵੀ ਨਹੀਂ ਬਦਲੀ, ਹੈ ਨਾ ?

ਡਯੂਡਾਰਡ :

ਬਦਲਗੀ ਕਿਉਂ ?

ਬੇਰੰਜਰ:

ਮੈਨੂੰ ਲੱਗਿਆ... ਥੋੜ੍ਹੀ ਖੁਰਦਰੀ ਤਾਂ ਨਹੀਂ, ਹੋਗੀ?

ਡਯੂਡਾਰਡ :

ਮੈਨੂੰ ਤਾਂ ਲੱਗਾ ਨਹੀਂ।

ਬੇਰੰਜਰ:

ਫੇਰ ਤਾਂ ਠੀਕ ਹੈ। ਬੜਾ ਹੌਸਲਾ ਮਿਲਦਾ।

ਡਯੂਡਾਰਡ :

ਕਿਉਂ, ਹੋਇਆ ਕੀ ਹੈ ਤੈਨੂੰ ?

ਬੇਰੰਜਰ:

ਪਤਾ ਨਹੀਂ; ਪਤਾ ਲੱਗਦਾ ਕਿਤੇ ? ਅਵਾਜ਼ਾਂ ਅਚਾਨਕ ਬਦਲ ਸਕਦੀਆਂ, ਉਹ ਬਦਲ ਜਾਂਦੀਆਂ, ਝੱਟ ਹੀ।

ਡਯੂਡਾਰਡ :

ਜ਼ੁਕਾਮ ਹੈ ਤੈਨੂੰ?

ਬੇਰੰਜਰ:

ਲੱਗਦਾ ਤਾਂ ਨਹੀਂ, ਬਿਲਕੁਲ ਵੀ ਨਹੀਂ। ਤੁਸੀਂ ਬੈਠ ਜਾਓ, ਇਥੇ ਬੈਠੋ, ਆਰਾਮ-ਕੁਰਸੀ 'ਤੇ।

ਡਯੂਡਾਰਡ :

(ਬੈਠਦੇ ਹੋਏ) ਕੀ ਹਾਲੇ ਵੀ ਦਰਦ ਹੈ ਇੱਥੇ ? (ਸਿਰ ਦੀ ਪੱਟੀ ਵੱਲ ਇਸ਼ਾਰਾ ਕਰਦਾ ਹੈ।)

ਬੇਰੰਜਰ:

ਓ ਹਾਂ, ਦਰਦ ਤਾਂ ਹੈ। ਪਰ ਰੋੜ ਕੋਈ ਨਹੀਂ, ਕਿਤੇ ਵੱਜਿਆ ਵੀ ਨਹੀਂ..., ਲਗਦੈਂ ਤੁਹਾਨੂੰ ?

(ਉਹ ਪੱਟੀ ਚੁੱਕ ਕੇ ਡਯੂਡਾਰਡ ਨੂੰ ਦਿਖਾਉਂਦਾ ਹੈ।)

ਡਯੂਡਾਰਡ :

ਨਹੀਂ, ਮੈਨੂੰ ਤਾਂ ਕੋਈ ਰੋੜ ਨਜ਼ਰ ਨਹੀਂ ਆਉਂਦਾ।

ਬੇਰੰਜਰ:

ਉਮੀਦ ਹੈ ਕਦੇ ਹੋਵੇਗਾ ਵੀ ਨਹੀਂ। ਕਦੇ ਨਹੀਂ।

ਡਯੂਡਾਰਡ :

ਜੇ ਤੁਸੀਂ ਕਿਤੇ ਟਕਰਾਏ ਨਹੀਂ, ਤਾਂ ਰੋੜ ਕਿਉਂ ਪਏਗਾ ?

ਬੇਰੰਜਰ:

ਜੇ ਤੁਸੀਂ ਦਿਲੋਂ ਇਹ ਨਾ ਚਾਹੇਂ, ਤਾਂ ਤੁਸੀਂ ਕਦੇ ਨਹੀਂ ਟਕਰਾ ਸਕਦੇ ਕਿਤੇ।

ਡਯੂਡਾਰਡ :

ਹਾਂ ਬਸ, ਥੋੜ੍ਹਾ ਖ਼ਿਆਲ ਰੱਖਣਾ ਪੈਂਦਾ। ਪਰ ਗੱਲ ਕੀ ਹੈ ? ਤੂੰ ਬੜਾ ਘਬਰਾਇਆ ਜਿਹਾ ਲਗਦੈਂ, ਪਰੇਸ਼ਾਨ ਵੀ..। ਮਾਈਗ੍ਰੇਨ ਕਰਕੇ ਹੋਏਗਾ। ਬਸ ਥੋੜ੍ਹਾ ਅਰਾਮ ਕਰੋ, ਸਭ ਠੀਕ ਹੋ ਜਾਏਗਾ।

ਬੇਰੰਜਰ:

ਮਾਈਗ੍ਰੇਨ! ਨਹੀਂ ਉਸਦੀ ਗੱਲ ਨਾ ਕਰੋਂ ਮੇਰੇ ਨਾਲ! ਬਿਲਕੁਲ ਨਹੀਂ!

ਡਯੂਡਾਰਡ :

ਮੈਂ ਸਮਝ ਸਕਦਾਂ ਤੁਹਾਡੀ ਹਾਲਤ; ਉਸ ਸਾਰੀ ਮਾਨਸਿਕ ਹਲਚਲ ਤੋਂ ਬਾਅਦ ਇਹ ਮਾਈਗ੍ਰੇਨ..

ਬੇਰੰਜਰ:

ਮੇਰੇ ਦਿਮਾਗ਼ 'ਚੋਂ ਨਿਕਲ ਹੀ ਨਹੀਂ ਰਿਹਾ!

85