ਪੰਨਾ:ਤਲਵਾਰ ਦੀ ਨੋਕ ਤੇ.pdf/57

ਵਿਕੀਸਰੋਤ ਤੋਂ
Jump to navigation Jump to search
ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ


ਦੂਲਿਆ ਸ਼ੇਰਾ

ਕਿਉਂ ਤਾਣ ਘੁਰਾੜੇ ਮਾਰਨੈਂ ਅਜ ਸਿੰਘ ਦਲੇਰਾ ।
ਕਰ ਯਾਦ ਸਮਾਂ ਤੂੰ ਬੀਤਿਆ ਜਦ ਰਾਜ ਸੀ ਤੇਰਾ ।
ਐਪਰ ਭੈੜੀ ਫੁਟ ਨੇ ਤੇਰਾ ਮਲਿਆ ਡੇਰਾ ।
ਖੂਨੀ ਧੌਂਸੇ ਖੜਕਦੇ ਘਤਣ ਨੂੰ ਘੇਰਾ ।

ਉਠ ਜਾਗ ਜਵਾਨ ਪੰਜਾਬੀਆ ਹੋ ਗਿਆ ਸਵੇਰਾ ।
ਵੇਲਾ ਨਹੀਂ ਹੁਣ ਸੌਣ ਦਾ ਉਠ ਦੂਲ੍ਹਿਆ ਸ਼ੇਰਾ ।

ਤੂੰ ਨਨਕਾਣੇ ਸਾਹਿਬ ਅੰਦਰ ਕਈ ਦੁਖ ਉਠਾਏ।
ਜੈਤੋ ਜਾ ਕੇ ਲਾਡਲੇ ਕਈ ਵੀਰ ਕੁਹਾਏ ।
ਪੰਜੇ ਸਾਹਿਬ ਇੰਜਣਾਂ ਹੇਠਾਂ ਦਰੜਾਏ ।
ਬਾਗ ਗੁਰੂ ਦੇ ਪੁਜ ਕੇ ਹੁੱਝਾਂ ਵਿਚ ਆਏ।

ਹੁਣ ਤਾਂ ਦੇਸ਼ 'ਚ ਝੂਲਣੈ ਤੇਰਾ ਉਚ ਫਰੇਰਾ ।
ਹਿੰਮਤ ਕਰ ਖਾਂ ਅਣਖੀਆ ਉਠ ਦੂਲ੍ਹਿਆ ਸ਼ੇਰਾ ।

ਗੁਰੂ ਅਸਥਾਨਾਂ ਤੇਰਿਆਂ ਤੇ ਹੱਕ ਜਤਾਂਦੇ ।
ਸੁਤੇ ਬਬਰ ਸ਼ੇਰ ਨੂੰ ਮੁੜ ਮੁੜ ਅਜ਼ਮਾਂਦੇ ।
ਅਪਣੇ ਖਾਤਰ ਜਗ ਦਾ ਪਏ ਖੂਨ ਰੁੜ੍ਹਾਂਦੇ ।
ਦੇ ਦੇ ਲੋਰੀਆਂ ਲਪੀਆਂ ਪਏ ਕੌਮ ਸਵਾਂਦੇ ।

ਫੜ ਕੇ ਝੰਡਾ ਸਿਦਕ ਦਾ ਇਕ ਲਾ ਦੇ ਫੇਰਾ ।
ਹੁਣ ਨਾ ਲੰਮੀਆਂ ਤਾਣ ਤੂੰ ਉਠ ਦੂਲ੍ਹਿਆ ਸ਼ੇਰਾ ।

-੫੩-