ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
ਹਸ ਹਸ ਕੇ ਇਹ ਆਖਣ ਲੱਗੇ
ਕਾਇਰ ਲਿੱਸੇ ਮਾੜੇ:
'ਗੁਰੂ ਗੋਬਿੰਦ ਸਿੰਘ ਖ਼ੂਬ ਬਣਾਯਾ
ਏਕਤਾਈ ਦਾ ਅੰਦਰ,
ਤੇਗ਼ਾਂ-ਦੇਵੀ ਪਰਗਟ ਕੀਤੀ
ਵਾਹ ਅਨੰਦਪੁਰ ਮੰਦਰ ।'
ਚਮਕੀ ਵਿਚ ਚਮਕੌਰ ਅਜੇਹੀ
ਲਾਲਾਂ ਪਰੀ ਸਵਾਣੀ,
ਉੱਛਲ ਉੱਛਲ ਕਰਦੀ ਗੱਲਾਂ
ਗਿਰੀ ਨਦੀ ਦਾ ਪਾਣੀ ।
ਲਾ ਰੱਤਾਂ ਦੇ ਝੱਟੇ ਕੀਤੀ ।
ਰੋਪੜ ਤੀਕਣ ਪਾਣੀ,
ਇਕ ਇਕ ਜ਼ਰਾ ਖੁਦਰਾਣੇ ਦਾ
ਪਾਵੇ ਪਿਆ ਕਹਾਣੀ,
ਅੰਤਰਿਆਂ ਦੀ ਦੇਵੀ ਬਣ ਕੇ
ਕੀਤੇ ਕਿਤੇ ਉਤਾਰੇ,
ਕੇਸ ਗੜ੍ਹੀ ਵਿੱਚ ਪਰਗਟ ਕੀਤੇ
ਸੁੰਦਰ ਪੰਜ ਪਿਆਰੇ ।
ਮਾੜੇ ਦੀ ਇਹ ਦਰਦਣ ਬਣਕੇ
ਦੁੱਖ ਵੰਡਾਵਣ ਆਈ,
ਚੋਭਾਂ ਲਾ ਲਾ ਸੁੱਤੇ ਹੋਏ
ਸ਼ੇਰ ਜਗਾਵਣ ਆਈ,
ਪਾਪ ਜ਼ੁਲਮ ਨੂੰ ਸਾਹਵੀ ਹੋ ਹੋ
ਹੱਥ ਵਿਖਾਵਣ ਆਈ,
ਤੋੜ ਤਿੜ੍ਹਾਂ ਨੂੰ ਨਾਲ ਨਵ੍ਹਾਂ ਦੇ
ਜ਼ੁਲਮ ਗਵਾਵਣ ਆਈ,
੧੩੬.
