ਇਹ ਪੰਨਾ ਪ੍ਰਮਾਣਿਤ ਕੀਤਾ ਗਿਆ ਹੈ
ਸ਼ੇਰਾ ਜ਼ਖਮੀਆ ! ਸਮਝ ਕੁਝ ਆਉਂਦੀ ਨਾ,
ਨੀਂਦ ਸੂਲਾਂ ਤੇ ਕਿਸਤਰ੍ਹਾਂ ਆਈ ਤੈਨੂੰ ?
ਮਾਛੀਵਾੜੇ ਦੇ ਤਿਖਿਆਂ ਕੰਡਿਆਂ ਚੋਂ,
ਦਿਤਾ ਇਸਤਰ੍ਹਾਂ ਕੁਝ ਸੁਣਾਈ ਮੈਨੂੰ ।
"ਅੜਿਆ ! ਸੂਲ ਸੀ ਮੈਨੂੰ ਸੁਰਾਹੀ ਵਰਗੀ,
ਖੰਜਰ ਮਸਤ ਪਿਆਲੜਾ ਮਾਹੀ ਮੈਨੂੰ ।
ਸਥਰ ਯਾਰ ਦਾ ਸੁਰਗ ਦੀ ਸੇਜ ਜਾਪੇ,
ਭੱਠ ਗ਼ੈਰ ਦੀ ਪਲੰਘ ਰਜਾਈ ਮੈਨੂੰ ।
ਸੂਲਾਂ ਉਤੇ ਮਜ਼ਲੂਮ ਦੀ ਆਰਜ਼ੂ ਦੀ,
ਮਿਲੀ ਹੋਈ ਸੀ ਨਰਮ ਵਿਛਾਈ ਮੈਨੂੰ ।
ਮੈਂ ਵੀ ਸੂਲ ਸਾਂ, ਸੂਲਾਂ ਤੇ ਸੂਲ ਵਾਂਗੂੰ,
ਸੂਲਾਂ ਇਕ ਨਾ ਸੂਲ ਚੁਭਾਈ ਮੈਨੂੰ ।
'ਮਾਨ' ਸੱਚ ਜੇਕਰ, ਮੈਥੋਂ ਪੁਛਦਾ ਏਂ,
ਐਸੀ ਨੀਂਦ ਫਿਰ ਕਦੀ ਨਹੀਂ ਆਈ ਮੈਨੂੰ ।
- ੫੩ -
