ਇਹ ਸਫ਼ਾ ਪ੍ਰਮਾਣਿਤ ਹੈ
ਮੈਦਾਨ ਦਾ ਮੋਹਰੀ
(ਸਿੰਘ ਦਾ ਸੁਭਾ)
ਰੋ ਰੋ ਜਗਤ ਇਤਹਾਸ ਇਹ ਦੱਸਦਾ ਏ,
ਹੁੰਦੇ ਰਹੇ ਨੇ ਜੰਗ ਜਹਾਨ ਅੰਦਰ ।
ਦੁਨੀਆਂ ਜਿਨ੍ਹਾਂ ਦੇ ਸਿੱਕੇ ਨੂੰ ਮੰਨਦੀ ਸੀ,
ਲੜੇ ਸੂੂਰਮੇ ਲੱਖਾਂ ਮੈਦਾਨ ਅੰਦਰ ।
ਜੰਗ ਕਈਆਂ ਨੇ ਕੀਤੀ ਹਕੂਮਤਾਂ ਲਈ,
ਲੁੱਟ ਧੰਨ ਦੀ ਕਈ ਮਚਾਉਂਦੇ ਰਹੇ ।
ਕਤਲ-ਆਮ ਕਰ ਕਈਆਂ ਡਰਾਏ ਲੋਕੀਂ,
ਕਈ ਮੰਦਰ ਮਸਕੀਨਾਂ ਦੇ ਢਾਹੁੰਦੇ ਰਹੇ ।
ਕਈਆਂ ਲਹੁ ਦੇ ਵਹਿਣ ਵਗਾ ਦਿੱਤੇ,
ਕੇਵਲ ਹਿਰਸ ਦੀ ਅੱਗ ਬੁਝਾਣ ਖ਼ਾਤਰ ।
ਲੜੇ ਕਈ ਸਿਕੰਦਰ ਨਪੋਲੀਅਨ ਕਈ,
ਸਾਰੇ ਜੱਗ ਤੇ ਝੰਡੇ ਝੁਲਾਣ ਖ਼ਾਤਰ ।
- ੮੬ -
