ਇਹ ਸਫ਼ਾ ਪ੍ਰਮਾਣਿਤ ਹੈ
( ੮੮ )
ਲਾਹੌਰੋਂ ਕਿਵੇਂ ਨਿਕਲੇ?
੮.
ਡੀ. ਏ. ਵੀ. ਕਾਲਜ ਦੇ ਹੋਸਟਲ ਵਿਚ ਸਰਦਾਰ ਭਗਤ ਸਿੰਘ ਦੇ ਸਾਥੀ ਸਨ। ਉਹ ਸਾਥੀ ਜਿਨ੍ਹਾਂ ਨਾਲ ਜੀਵਨ-ਮਰਨ ਦੀ ਸਾਂਝ ਸੀ, ਜੋ ਵਤਨ ਦੀ ਖਾਤਰ ਹਰ ਔਕੜ ਦਾ ਸਾਹਮਣਾ ਕਰਨਾ ਚਾਹੁੰਦੇ ਸਨ। ਚੰਨਣ ਸਿੰਘ ਦੀ ਮੌਤ ਦੇ ਪਿਛੋਂ ਪੁਲਸ ਦਾ ਫੌਰੀ ਖਤਰਾ ਟਲ ਗਿਆ | ਭਗਤ ਸਿੰਘ, ਚੰਦਰ ਸੇਖਰ ਤੇ ਰਾਜ ਗੁਰੁ ਹੋਸਟਲ ਵਿਚ ਵਿਦਿਆਰਥੀਆਂ ਕੋਲ ਚਲੇ ਗਏ। ਸਮੇਂ ਦਾ ਇਕ ਮਿੰਟ ਵੀ ਐਵੇਂ ਗਵਾਉਣ ਵਾਲਾ ਨਹੀਂ ਸੀ। ਪਲੋ ਪਲੀ ਨੂੰ ਪੁਲੀਸ ਦੀ ਧਾੜ ਦੇ ਪਜਣ ਦਾ ਭੈ ਸੀ। ਸਮੇਂ ਦੀ ਕਦਰ ਕਰਦਿਆਂ ਹੋਇਆਂ ਉਨ੍ਹਾਂ ਨੇ ਝਟ ਪਟ ਭੇਸ ਬਦਲਨ ਦਾ ਯਤਨ ਕੀਤਾ।
ਸਰਦਾਰ ਭਗਤ ਸਿੰਘ ਨੇ ਕੇਸ ਕਟਵਾ ਦਿਤੇ। ਇਕ ਵਿਦਿਆਰਥੀ ਦਾ ਵਧੀਆ ਗਰਮ ਸੂਟ ਪਾ ਕੇ ਸਿਰ ਉਤੇ ਹੈਟ (ਟੋਪੀ) ਰੱਖ ਲਿਆ। ਨਿਕਟਾਈ ਬੰਨੀ। ਪੁਰਾ ਸਾਹਬ ਬਣ ਗਿਆ, ਪੁਲਸ ਵਾਲਿਆਂ ਕੀ ਪਛਾਣਨਾ ਸੀ, ਉਸ ਵੇਲੇ ਘਰ ਦੇ ਵੀ ਪਛਾਣ ਨਹੀਂ ਸਨ ਸਕਦੇ।
'ਹੁਣ ਕਿਧਰ ਜਾਓਗੇ?'ਭਗਤ ਸਿੰਘ ਦੇ ਉਸ ਮਿਤ੍ਰ ਨੇ ਭਗਤ ਸਿੰਘ ਨੂੰ ਪੁਛਿਆ, ਜਿਸਨੇ ਸੂਟ ਦਿਤਾ ਸੀ।
