ਸ਼ਹਿਰ ਗਿਆ ਕਾਂ
ਕਾਂ ਇਕ ਕਿਸਾਨ ਦੇ ਖੇਤ ਵਿਚ ਰਹਿੰਦਾ ਸੀ। ਉਸਨੇ ਕਿਸਾਨ ਦੇ ਖੇਤ ਵਿਚ ਖੜ੍ਹੀ ਕਿੱਕਰ ਉਪਰ ਆਪਣੇ ਰਹਿਣ ਲਈ ਆਲ੍ਹਣਾ ਬਣਾਇਆ ਹੋਇਆ ਸੀ।
ਕਾਂ ਕਿਸਾਨ ਦੇ ਖੇਤ ਵਿਚ ਵਧੀਆ ਦਿਨ ਬਤੀਤ ਕਰ ਰਿਹਾ ਸੀ। ਇਥੇ ਉਸਨੂੰ ਕੋਈ ਤੰਗੀ ਨਹੀਂ ਸੀ। ਜਿਸ ਕਿੱਕਰ ਉੱਪਰ ਕਾਂ ਦਾ ਆਲ੍ਹਣਾ ਸੀ, ਉਸਦੇ ਕੋਲ ਹੀ ਕਿਸਾਨ ਦਾ ਟਿਊਬਵੈੱਲ ਸੀ। ਟਿਊਬਵੈੱਲ ਤੋਂ ਕਾਂ ਨੂੰ ਹਰ ਵਕਤ ਤਾਜ਼ਾ ਤੇ ਸਾਫ਼ ਪਾਣੀ ਪੀਣ ਨੂੰ ਮਿਲਦਾ ਸੀ। ਕਾਂ ਨੂੰ ਕਿਸਾਨ ਦੇ ਖੇਤ ਵਿਚੋਂ ਚੋਗਾ ਵੀ ਅਸਾਨੀ ਨਾਲ ਮਿਲ ਜਾਂਦਾ ਸੀ।
ਭਾਵੇਂ ਕਾਂ ਨੂੰ ਇਥੇ ਕਿਸਾਨ ਦੇ ਖੇਤ ਵਿਚ ਕੋਈ ਤੰਗੀ ਨਹੀਂ ਸੀ, ਫਿਰ ਵੀ ਉਸਦਾ ਮਨ ਸ਼ਹਿਰ ਜਾਕੇ ਵਸਣ ਨੂੰ ਲਲਚਾਉਂਦਾ ਰਹਿੰਦਾ। ਕਾਂ ਦੋ-ਚਾਰ ਦਿਨ ਕਿਸੇ ਹੋਰ ਕਾਂ ਨਾਲ ਸ਼ਹਿਰ ਘੁੰਮਣ ਚਲਾ ਗਿਆ ਸੀ ਤੇ ਸ਼ਹਿਰੀ ਚਕਾਚੌਂਧ ਨੇ ਕਾਂ ਦਾ ਮਨ ਮੋਹ ਲਿਆ ਸੀ। ਹੁਣ ਕਾਂ ਦਾ ਦਿਲ ਕਰਦਾ ਕਿ ਕਿਹੜਾ ਵੇਲਾ ਹੋਵੇ, ਉਹ ਸ਼ਹਿਰ ਚਲਾ ਜਾਵੇ।
"ਸ਼ਹਿਰ ਜਾਕੇ ਮੈਂ ਵੀ ਰੋਜ਼ਾਨਾ ਸ਼ਾਮ ਨੂੰ ਗੋਲਗੱਪੇ, ਚਾਉਮਿਨ, ਬਰਗਰ ਤੇ ਹੋਰ ਚਟਪਟਾ ਖਾਇਆ ਕਰੂੰਗਾ। ਮੈਂ ਵੀ ਰੋਜ਼ਾਨਾ ਫ਼ਿਲਮ ਵੇਖਿਆ ਕਰੂੰਗਾ।" ਕਾਂ ਸੋਚਦਾ।
